Меѓународниот аеродром „Вашингтон Далес“ во Вирџинија, САД, во следната деценија планира обнова вредна 22 милијарди долари, во чии рамки ќе се обноват и изградат околу 464 илјади квадратни метри простор.
Во рамките на овие планови спаѓа и изградбата на повеќекатна гаража со дури 32.000 места, која ќе биде најголема во светот. Паркинг-гаражата би требало да се наоѓа во близина на главниот терминал на аеродромот, а потенцијално би можела да биде висока и до 15 ката.
Титулата за најголем паркинг за автомобили моментално ја има паркингот во трговскиот центар „Вест Едмонтон мол“ во Едмонтон, Канада, кој може да прими 20 илјади возила. Таа титула ја потврди и Гинисовата книга на рекорди и ја носи од 18 септември 1981 година.
Ако случајно дојдете до „Вест Едмонтон мол“ во Канада и не најдете паркинг-место, во непосредна близина на шопинг-центарот се наоѓа дополнителен паркинг кој може да прими уште 10 илјади автомобили.