Цените на становите во Европската Унија во периодот од 2015 до 2025 година пораснале во просек за 6,8 отсто побрзо од приходите на домаќинствата, објави „Евростат“.

Службата на ЕУ за статистика истакнува дека овој показател, кој ги споредува промените на цените на становите со промените на бруто-расположивиот доход на домаќинствата по жител, е зголемен во 17 земји од ЕУ, додека во преостанатите 10 е забележан пад.

Најголем раст на односот меѓу цените на становите и приходите на домаќинствата е забележан во Португалија, каде што изнесувал 60,8 отсто.

Следуваат Холандија со 34,3 отсто, Унгарија со 26,5 отсто, Чешка со 25,8 отсто и Шпанија со 24,5 отсто.

На другата страна, најголем пад на овој показател е регистриран во Романија, за 42,8 отсто, потоа во Финска за 25,2 отсто и Бугарија за 16,2 отсто.

„Евростат“ наведува дека овој показател мери колку се промениле цените на становите во однос на приходите во текот на одреден период, но не претставува директна споредба на апсолутната достапност на недвижностите во различни држави.

Другиот показател за достапноста на домувањето, кој го споредува односот меѓу цените на недвижностите и приходите со нивниот долгорочен просек од 2000 година, укажува на два изразени максимуми – во 2007 година, во пресрет на глобалната финансиска криза, кога бил 7,9 отсто над долгорочниот просек, и во 2022 година, кога бил поголем за 7,4 отсто.

Потоа, показателот опаѓал во текот на 2023 и 2024 година, за во 2025 година повторно да се најде незначително над долгорочниот просек, за 0,03 отсто.