Новата глобална анализа за 2026 година донесе големо изненадување на самиот врв на листата: Естонија е официјално прогласена за најдобра земја во светот за преселување и живеење.

Според најновиот индекс на компанијата „Румави“, оваа балтичка држава однесе победа во конкуренција од дури 192 земји и територии. Клучните адути на Естонија беа нејзината супериорна дигитална и банкарска инфраструктура, извонредните можности за развој на бизнис, како и високото ниво на заштита на имотното право за странските државјани.

Секоја година, индексот мери 24 различни параметри поделени во четири категории: финансии и даноци, квалитет на живот и здравство, безбедност и стабилност, како и леснотија на прилагодување и деловни можности.

Највисоки оценки за бизнисот и банките

Естонија оствари импресивни резултати во повеќето категории:

Банкарски систем и валута: 99 од 100 поени;
Бизнис-можности: 96 од 100 поени;
Зелени површини: 86 од 100 поени;
Пристапност до домување: 82 од 100 поени;
Безбедност на улиците: 77 од 100 поени.

Единствената точка на која потфрли е климатската удобност(само 20 од 100 поени), пред сè поради долгите, студени и темни зими. Сепак, целокупните услови за живеење и работа ја лансираа на првото место.

Која друга земја се најде на самиот врв?

Европа доминира на оваа листа со дури пет земји меѓу првите 10. Веднаш зад Естонија, од европските земји, се наоѓа Португалија на 4. место, високо оценета поради стабилноста, безбедноста и банкарскиот систем, иако има нешто послаб резултат кога станува збор за данокот на доход.

Уште една балтичка земја, Литванија, го зазеде 6. место, додека топ 10-листата ја заокружуваат Чешка на 9. место и Малта на 10. место.

Топ 10 најдобри земји во светот за преселување

1. Естонија
2. Сингапур
3. Малезија
4. Португалија
5. Тајван
6. Литванија
7. Хонгконг
8. Сент Китс и Невис
9. Чешка
10. Малта

Каде треба да одат дигиталните номади, а каде семејствата?

Истражувањето нуди и приспособени листи во зависност од потребите на различните групи патници и работници.

За семејствата: Естонија повторно е број еден во светот, благодарение на високото ниво на безбедност, одличниот образовен систем и квалитетното здравство.

За претприемачите: Естонија го држи второто место во светот, веднаш зад Сингапур.

За дигиталните номади: На прво место е Малезија, додека Португалија е втора во светот поради трошоците за живот, дигиталната инфраструктура и поволниот даночен третман за странските приходи.

За пензионерите: Португалија се наоѓа на високото трето место во светот, пред сè поради квалитетот на здравствената заштита и климата.

Извор: BIZlife.rs
Фото: Magnific