Интересот за изучување на македонскиот јазик кај сегашните генерации, за жал, сѐ повеќе опаѓа. Искрено се надевам дека во иднина ова ќе се смени и ќе се зголеми популарноста на овој факултет. Студирањето и познавањето на мајчиниот јазик го облагородуваат младиот човек и воедно ни овозможуваат да го чуваме нашето јазично богатство, вели Ирена.
Ирена Спировска повеќе од две децении наназад се врзува со ТВ-водителството кај нас. Таа важи за една од најистрајните личности на македонскиот ТВ-етер, каде што има променето низа телевизиски станици и емисии и сѐ уште е една од најбараните водителки.
Родена и порасната во Скопје, Ирена паралелно со нејзините студии на Институтот за класични студии на Филозофскиот факултет во Скопје почнала и со ангажман во Македонската радио-телевизија. И покрај тогашните редовни ТВ-обврски, таа успеала да го заврши факултетот на Катедрата за македонски јазик и јужнословенска книжевност.
- Интересот за изучување на македонскиот јазик кај сегашните генерации, за жал, сѐ повеќе опаѓа. Разочарувачки е податокот дека во оваа студиска година (2022/23) на Катедрата за македонски јазик се запишани само 16 студенти (вкупно редовни и вонредни). Искрено се надевам дека во иднина ова ќе се смени и ќе се зголеми популарноста на овој факултет. Студирањето и познавањето на мајчиниот јазик го облагородуваат младиот човек и воедно ни овозможуваат да го чуваме нашето јазично богатство - вели Ирена.
Во рубриката „Кога бев студент“, која ја креираме во соработка со „Пивара Скопје“, ја навративме на факултетските предавања, дружења, предизвици.
![](/images/news/2022/10/20221007-koga-bev-student-so-irena-spirovska-poslednite-ispiti-gi-polozhiv-koga-kjerka-mi-beshe-bebe-a-uchev-dodeka-spieshe-1.jpg)
Сите испити од прва година ги положив уште во јунската сесија
Иако учела средно медицинско училиште, Ирена никогаш немала голема желба и амбиција да се занимава со медицина. Таа била на отсекот забни техничари, а најголемиот плус од нејзиниот претстој таму е што се вљубила во латинскиот јазик и тоа било предуслов да се запише на Филозофскиот факултет, каде што подоцна се префрлила на Катедрата за македонски јазик и јужнословенска книжевност.
- Многу го засакав латинскиот јазик, па затоа по матурирањето се запишав на Факултетот за класични студии. Истовремено почнав да работам и како хонорарен соработник во Македонската радио-телевизија. Сите испити од прва година ги положив уште во јунската сесија, но со текот на времето моите обврски и ангажманите во телевизија почнаа да се зголемуваат, па не бев во можност да ги следам редовно предавањата од втора година. Поради специфичноста на мртвите јазици, како што се старогрчкиот и латинскиот, не постоеше можност за вонредно студирање на Факултетот по класични студии, па одлучив да се префрлам на Катедрата за македонски јазик и јужнословенска книжевност, за да можам да продолжам да работам и да студирам истовремено - додава Ирена.
Особено ги сакав предавањата на професорот Венко Андоновски
Поради тоа што паралелно студирала и работела, Ирена немала класичен студентски живот. Таа постојано била на релација дома – МРТВ - факултет, но сепак наоѓала начин да стигне секаде навреме и да ги заврши обврските, што според неа е клуч за успехот.
- Сите предмети ми беа еднакво интересни и инспиративни. Особено ги сакав предавањата на професорот Венко Андоновски. Најчесто учев ноќе, кога сѐ беше мирно и кога немав други обврски. Преку ден најмногу сакав да учам сама во библиотека, а со колегите често пиевме кафе за време на паузите и разменувавме заклучоци. Во тоа време трговскиот центар Мавровка беше особено популарен. Олеснителна околност беше што сѐ ми беше блиску. Зградата на МРТ е веднаш наспроти факултетот, што ми даваше можност да претрчам од работа на факултет или обратно. Со оглед на тоа дека студирав и работев, имав свој џепарлак и возев автомобил, па за мене студентскиот живот беше особено динамичен, забавен и исполнет - се присетува Ирена.
![](/images/news/2022/10/20221007-koga-bev-student-so-irena-spirovska-poslednite-ispiti-gi-polozhiv-koga-kjerka-mi-beshe-bebe-a-uchev-dodeka-spieshe-2.jpg)
Последните три испити ги положила откако станала мајка
Со оглед на тоа што и додека студирала, Ирена ја ставала работата на прво место, факултетските обврски знаеле понекогаш да трпат. Згора на тоа, при крајот на студирањето таа се соочила со уште еден убав предизвик - мајчинството, така што го завршила факултетот учејќи за испитите со нејзината ќерка Зорица додека спиела покрај неа.
- Времето потребно да спремам испит зависеше од предметот што го подготвував, но и од моите работни обврски. Некогаш се случуваше за кратко време да спремам испит, а некогаш ми требаа месеци за да успеам да најдам време да го научам целиот материјал. Затоа и студирањето го развлеков малку повеќе, бидејќи работата ми беше на прво место. Во меѓувреме ја родив и мојата ќерка, па последните три испити ги положив кога Зорица беше бебе. Учев додека таа спиеше и го искористив тој период да ги завршам обврските со факултетот - раскажува Ирена.
![](/images/news/2022/10/20221007-koga-bev-student-so-irena-spirovska-poslednite-ispiti-gi-polozhiv-koga-kjerka-mi-beshe-bebe-a-uchev-dodeka-spieshe-3.jpg)
Планинарењето ми беше омилено хоби, го искачив Триглав на 22 години
Фармерки, старки, кошула или блузон за на факултет, наспроти формалните високи потпетици и елегантни фустани за пред ТВ-екраните. На тој начин варирал стилот на Ирена за време на студентските денови. Таа тогаш интензивно се дружела со нејзините колеги, а по дипломирањето тие контакти малку избледнале. Сепак, преку социјалните мрежи успеале да се вратат.
- Имавме омилени места за излегување кои редовно ги посетувавме, како МНТ, „Хард рок“, „Кристијан“, „Панда“ и др. Журките во тоа време траеја до раните утрински часови, па често ги завршуваме одејќи на симит-погача во познатата пекарница „Фурна“ во Чаир. На факултет сите одевме скромно и пристојно облечени, како што му доликува на студент. Планинарењето ми беше омилено хоби за време на студентските години. Највисокиот врв во Југославија - Триглав (2.864 м.н.в.) првпат го искачив кога имав 22 години - завршува Ирена.
фото: Приватна архива