Замислете да можете да го „фатите“ вашиот локален политичар и да го прашувате што и да сакате и кога сакате, без да закажете посета и бесконечно да чекате одговор.

Токму ова сака да го овозможи еден британски пратеник. Марк Сјуардс, пратеник од Лабуристичката партија за изборната единица „Лидс Саутвест и Морли“, претставил виртуелна вештачка верзија од себеси дизајнирана да одговара на прашања 24 часа на ден и да им помага на граѓаните со секојдневните прашања.

- Многу сум заинтересиран да истражам како новите технологии, како што е вештачката интелигенција, можат да ја зајакнат врската помеѓу канцелариите на претставниците и граѓаните што ги претставуваме - истакнал Сјуардс во соопштението.

Целта е да се понуди постојано достапна услуга преку која граѓаните можат да пријавуваат локални проблеми, да прашуваат за политички прашања или да испратат порака до канцеларијата на претставникот, без да чекаат со недели за официјален одговор.

- Ботот едноставно им дава на луѓето уште една опција да ме контактираат, во секое време - напишал Сјуардс.

Како една технолошка компанија го создаде клонот со вештачка интелигенција на Сјуардс

Стартапот „Неурал војс“, со седиште во Лидс, разви дигитална верзија на Сјуардс, нарекувајќи го „првиот виртуелен пратеник во Велика Британија“. Компанијата користи напредна синтеза на глас и обработка на природен јазик за да создаде гласовни асистенти со вештачка интелигенција за телефонски системи и веб-страници.

Дигиталниот двојник на Сјуардс е создаден со користење на неговите парламентарни аудиоснимки, профили на социјалните медиуми и мината преписка со јавноста - за прецизно да се реплицира неговиот стил на говорење, тон и изрази, велат од компанијата.

Тие се надеваат дека новата технологија ќе ги направи локалните политичари подостапни.

Тој верува дека технологијата наскоро би можела да стане вообичаена практика како за другите пратеници, така и за компаниите што сакаат да го премостат комуникацискиот јаз.