Првиот долгометражен филм на актерот на МНТ вечерва во 20:15 часот ќе ја има својата премиера во „Синеплекс“


Претставата „Копање“ од Кристијан Винклер, која пред една година беше поставена на репертоарот на Македонскиот народен театар, од вечерва ќе добие и своја филмска верзија. Арт-хаус филмот со истиот наслов, во режија на актерот Ивица Димитријевиќ, ќе биде премиерно прикажан во киното „Синеплекс“ во Скопје, во 20:15 часот. Кумановскиот актер и музичар неколку години е дел од ансамблот на МНТ, а сега се пробува и во режисерските води. Филмот е во продукција на MI Film. https://www.youtube.com/watch?v=-oLbYothJM4
Интересно е како се родила идејата за филмскиот проект.
- Во претставата се употребуваа камери. За време на една од пробите со камерите направив една фотографија од позицијата на камерата и тоа изгледаше доста филмски. Оттаму ми дојде и првичната идеја. Подоцна таа идеја за филм ја споделив со Гораст Цветковски и Александар Ѓорѓиески, со Кристијан Винклер, авторот на текстот, и со монтажерот и продуцент Мартин Иванов и сите ја поздравија и несебично се вклучија во нејзината реализација. Ете, таа стана реално дело и си почнува свој живот и на платно. Секако, тука голем придонес дадоа и сите луѓе што директно или индиректно беа вклучени во изработката на филмот.


Го прашавме што најмногу го фасцинирало во приказната:
- Тоа е начинот на кој е напишана приказната за едно другарство кое 16 години е нефункционално и како тоа другарство се обидува да проработи по толку време. Ме фасцинираа ненапишаните работи што лебдат цело време додека се кажуваат и се случуваат напишаните.
Сега за сега филмот ќе се прикажува само во Cineplexx, а малата екипа ќе се обиде да го пласира и на фестивали. Најверојатно ќе се прикажува и во други градови во земјава.


Филмската уметност не е нова страст за талентираниот актер. Тој дури сакал да студира режија, но годината кога сакал да се запише немало конкурс за режија.
- Филмот ме интересира уште пред да се запишам на глума. Јас и дојдов на ФДУ со намера да се запишам на режија, ама таа година немаше и требаше да чекам две години. Истовремено ме интересираше и глума, а имав и некој мал опит, школско аматерски, во глумата. Значи, режијата ми е стара љубов. Снимањето, слободно можам да кажам, беше антологиско во доста сегменти, инспиративно, радосно, голем предизвик за сите и големо искуство. Одговорноста е уште поголема зад камерата отколку пред неа – вели Димитријевиќ.
„Копање“ не е единствениот филмски проект што Димитријевиќ го работел минатата година. Годинава се очекуваат премиерите на уште два филма – еден документарен и уште еден игран.