Исак Њутн е еден од најголемите научници во историјата, човек кој во 17 век ги формулира законите за движењето и универзалната гравитација. Но, зад неговата научна работа постоеше и силна религиска страна која со децении им го привлекуваше вниманието на историчарите.

Токму верата на Њутн била поврзана со неговиот обид да ги протолкува библиските пророштва и да одреди кога би можел да заврши светот каков што го познаваме. Според неговите пресметки, годината која притоа се појавува е 2060.

Стивен Снобелен, директор на Канадскиот проект „Њутн“, ги објасни религиските убедувања на Њутн и начинот на кој тие влијаеле врз неговото размислување за иднината на човештвото.

Њутн верувал дека Библијата ги опишува идните настани

Снобелен во својот блог напиша дека Њутн верувал во Бог, но и дека Библијата е Божја објава. Њутн сметал дека Бог не е ограничен со времето на ист начин како луѓето и дека поради тоа може да го види „крајот од почетокот“.

- Њутн верувал и во Бог и дека Библијата е Божја објава. Исто така, верувал дека Бог не е врзан со времето како луѓето, што му овозможува да го види ‘крајот од почетокот’. Затоа, користејќи ги сопствените зборови на Њутн, тој бил убеден дека ‘светите пророчки книги’ во Библијата се истории на идните настани - вели Снобелен.


До 2060 дошол со едноставна пресметка

Обидот на Њутн да одреди иден датум не се засновал на сложени математички модели. За да дојде до конечниот датум, тој направил едноставни пресметки на хартија, користејќи различни временски периоди. Снобелен ги опиша тие пресметки како „едноставна аритметика која би можело да ја изведе и дете“. Резултатот до кој дошол Њутн била 2060 година. Иако Њутн во своите записи предупредувал дека пред таа година би можело да има „војни и катаклизми“, неговата визија за 2060 година не претставувала нужно уништување на човештвото или целосен крај на сè. Напротив, според Снобелен, Њутн на тој датум гледал повеќе како на пресвртна точка меѓу два периода.

За Њутн, 2060 не била само година на уништување

-За Њутн, 2060 година би била повеќе како нов почеток. Тоа би било крај на една стара доба и почеток на нова ера - напиша Снобелен.

Англискиот научник веројатно очекувал дека по тој пресвртен период ќе следува доаѓањето на Христос и воспоставување на Божјото Царство на Земјата кое би траело илјада години.

Со други зборови, визијата на Њутн за иднината не била само пророштво за пропаст. Во неговото толкување, по големите судири и катаклизми, требало да следува нова ера.

Дали предвидувањето на Њутн ќе се оствари?

Њутн ја изгради својата репутација благодарение на научните откритија кои од темел го променија разбирањето на физиката, но неговите религиски убедувања и обиди за толкување на библиските пророштва покажуваат сосема друга страна на неговата интелектуална работа.

Годината 2060 остана запишана во неговите пресметки како важна идна граница. Објаснувањето на Снобелен притоа нагласува дека Њутн не предвидувал „крај на светот“ во смисла на целосно уништување, туку крај на еден период и почеток на нова ера.