Во САД се појави необична услуга за оние што сакаат да го избегнат хаосот што следува при евакуација пред силен ураган. Американска компанија нуди годишно членство од 1.250 долари по лице со кое се обезбедува место на однапред организиран евакуациски лет од Флорида.

Програмата е наменета за жителите на Флорида, каде што во сезоната на урагани евакуацијата може да значи километарски колони на автопатите, распродадени авионски билети и затворени аеродроми. Компанијата „Прајорити ивак“ сака да им овозможи на членовите да го напуштат подрачјето пред условите да станат опасни за патување. До оваа идеја дошол основачот Џејсон Мурџи откако во 2019 година слушнал од пријател за неговата трауматична евакуација.

- Неговото семејство имаше голем проблеми да најде летови. Не беа на истите летови, цените беа астрономски, а владееше целосен хаос. Си реков дека мора да постои начин да се направи ова - вели Мурџи.

Мурџи, инвестициски банкар специјализиран за осигурување, во следните неколку години барал подобар начин за евакуација на луѓето за време на урагани. Географската положба на Флорида претставувала очигледен предизвик. Станува збор за долг полуостров, а кога се приближува голема бура, најголемиот дел од сообраќајот при евакуацијата се движи во иста насока - кон север.

Затоа се обидел да смисли модел што би овозможил евакуација на голем број луѓе. Се здружил со авиокомпанијата „Глоубал кросинг ерлајнс“ од Мајами за секоја година, пред почетокот на сезоната на урагани, да резервира авиони и да обезбеди тие да бидат достапни кога некоја посериозна бура ќе се закани.

Мурџи, исто така, собрал тим со големо искуство во справувањето со катастрофи, а во тимот го вклучил и Воли Барнс, поранешен главен прогнозер на Националниот центар за урагани. Тој помогнал во развојот на временските критериуми врз чија основа се одредува кога треба да се активираат летовите.

Како функционира „Прајорити ивак“

„Прајорити ивак“ моментално им нуди услуги на жителите и сопствениците на сезонски куќи во 12 окрузи по должината на источниот и западниот брег на Јужна Флорида. Летовите полетуваат од Мајами, Форт Лодердејл, Вест Палм Бич, Тампа, Сарасота и Форт Мајерс и ги превезуваат членовите до Атланта.

Компанијата ги користи критериумите за прогнозирање на Националниот центар за урагани за да одлучи кога ќе ги активира летовите. Кога ќе се достигнат тие прагови, членовите добиваат телефонски повици, СМС-пораки и е-пошта од назначените менаџери. Тие помагаат во координирањето на секој чекор од евакуацијата - од потврдувањето дали лицето ќе го напушти подрачјето до упатувањето кон соодветниот аеродром.

Целта е членовите да бидат во воздух приближно 30 до 72 часа пред ветровите да станат доволно силни за да го попречат авионскиот сообраќај, а не непосредно пред ураганот да стигне до копното.

- Сите размислуваат за моментот кога ураганот ќе стигне до копното, но евакуациите мора да се извршат многу порано. Особено ако користите авијација, бидејќи ветерот ја одредува можноста за летање - вели Мурџи.

Годишното членство вклучува две евакуации во случај на бури што ги исполнуваат критериумите. Членовите не се обврзани да се евакуираат, но ако компанијата ги активира летовите поради бура, тоа се смета за една од двете евакуации, дури и ако одлучат да го напуштат подрачјето на друг начин.

Атланта е избрана затоа што е доволно блиску за авионите да можат повеќепати да летаат дотаму и назад, а истовремено има еден од најголемите аеродроми во земјата, голем број хотели, компании за изнајмување автомобили и можности за продолжување на патувањето со авион. Ако бурата ја загрози Атланта, компанијата наведува дека летовите може да ги пренасочи кон Шарлот или Нешвил. По пристигнувањето на дестинацијата, членовите сами се одговорни за организирање сместување и превоз до дома по минувањето на бурата.

Дали навистина постои потреба од ваква услуга?

Очигледното прашање е дали „Прајорити ивак“ решава вистински проблем или само нуди уште еден начин луѓето да направат нешто што би можеле сами да го организираат.

Од перспектива на метеорологот Аманда Папас од Мајами проблемот е многу реален. Таа со години ги следи ураганите на Флорида и споделува различни совети за временските услови на социјалните мрежи. Таа вели дека евакуациите станале сè потешки како што растел бројот на жители во државата и како што сè повеќе луѓе се доселувале во загрозените крајбрежни заедници.

За време на ураган, вели Папас, најголемиот предизвик не е логистиката, туку психологијата. Луѓето редовно се убедуваат себеси дека имаат повеќе време отколку што навистина имаат.

- Кога се приближува бура, морам да бидам речиси како психолог. Многу луѓе чекаат апсолутно до последниот момент за евакуација - вели таа.


Дали вредат 1.250 долари?

Дали членството вреди 1.250 долари, зависи од тоа како гледате на подготовката за ураган.

- Би го нарекол ова инвестиција во подготвеноста. Би го ставил во иста категорија со купувањето домашни генератори, заштитни капаци за прозорци и дополнително осигурување од поплави - вели Мурџи. Со други зборови, тоа е инвестиција за која се надевате дека никогаш нема да морате да ја искористите.

За Мурџи, сепак, она што тој всушност го продава не е лет за евакуација од ураган.

- Тие купуваат мир. Купуваат план - вели тој.

Извор: 021.rs
Фото: Magnific