Да му се помогне на колега од работа, да се интересира за здравјето на соседите во доцни години, да го пропуштите автомобилот во време на метеж – цела низа секојдневни убави гестови сега ќе бидат предмет на научни истражувања на Универзитетот на Калифорнија во Лос Анџелес (УКЛА), каде што синоќа официјално беше отворен Институтот за љубезност.
Тоа е интердисциплинарна студија која ќе ја истражува љубезноста преку еволуцијата, биологијата, психологијата, економијата, културата и социологијата, се вели во соопштението на Универзитетот.
- Институтот „Бедари“ за љубезност во УКЛА сака да биде противтежа на актуелниот политички контекст во свет полн со насилство и тензии - рече Дарнел Хант, декан на Факултетот за општествени науки на Универзитетот на Калифорнија.
Метју Харис, коосновач на Институтот, објаснува дека љубезноста лежи во секој од нас и ќе бидат потребни многу истражувања за да се разбере зошто љубезноста е толку ретка во современиот свет.
Научните студии покажаа дека љубезните гестови имаат многу позитивен ефект врз физичкото и менталното здравје на луѓето, а можат да бидат и заразни за луѓето што се сведоци на вакви потези.
Извор: МИА