Грчките образовни власти евидентирале околу 2.500 наставници на национално ниво кои се сметаат за неспособни да ја извршуваат наставата во училница, најчесто поради психолошки причини. Овие наставници во системот се означени како „неспособни“, термин што се користи за наставници кои се сметаат за неподобни за настава.

Директорите на училиштата често се двоумат да покренат постапки против вакви наставници, стравувајќи од обвинувања за стигматизација или лична правна одговорност. Како резултат на тоа, велат официјалните лица, интервенцијата често се одложува сè додека не се случи екстремен инцидент или додека родителите не поднесат претставки.

Еден неодамнешен случај во основно училиште во Серес го истакна овој проблем. Наставник му ја залепил устата на ученик со селотејп, а потоа побарал од друг ученик да му ги врзе рацете. Откако случајот стана јавен, административните власти реагираа и предметот беше проследен до судовите.

По инцидентот, министерката за образование Софија Захараки ја реактивира иницијативата што ја развила додека била заменик-министер во периодот од 2019 до 2021 година. Предлогот предвидува психолошки процени за наставниците при вработување во јавното образование, а и во редовни интервали.

- Правната рамка за оценување на вакви случаи постои. Но, во неколку случаи недостига волја на училишно или локално административно ниво да се постапи по прашање што е особено чувствително. Може да постои толеранција или страв од преземање одговорност - изјави генералниот секретар на Министерството за образование, Јоанис Пападомаракаракис.

Дијагнозата на ментално заболување и неспособност за настава ја поставува здравствена комисија при Министерството за здравство, по иницијатива на самиот наставник или со поттик од членовите на семејството. Наставниците кај кои е утврдено дека не се способни за настава се распоредуваат на административни работни места со одлука на службите на Министерството за образование, во согласност со медицинските препораки. Процените се повторуваат еднаш годишно.

Јоанис Кументос, директор на основното образование во Атика, изјави дека 88 наставници во неговата надлежност се прогласени за неспособни за настава и сега извршуваат административни задачи.

- Тие се многу корисни. Повеќето веруваат дека немаат проблем, што е разбирливо, бидејќи таквото признание е тешко, а менталната болест често се смета за стигма - вели тој.

Охрабрувањето на наставниците да побараат медицинска помош е индиректно, почнувајќи со препораки и засилувајќи се доколку проблемите се продлабочат.

Министерката за образование има цел да воспостави превентивна рамка за процена пред вработување, со вклучување комисии од медицински психолози во соработка со Министерството за здравство. Планот предвидува и трајно административно прераспоредување по три години, како и проширена правна заштита за образовните службеници кои постапуваат во вакви случаи.

Извор: Ekathimerini.com
Фото: Freepik