Ново истражување покажа кои националности се сметаат за најпристојни туристи, кој остава најголем бакшиш, кој троши најмногу, а кој на патувањата најмногу бара авантура и ужива во храната.

Однесувањето за време на патувањата може да остави силен впечаток, особено што често е лесно да се процени од која земја доаѓа некој - според новото истражување, некои националности се издвојуваат по своите „туристички манири“.

Така, на пример, јапонските туристи се прогласени за најпристојни во светот, а зад нив се Норвежаните и Швајцарците, додека за Американците важи дека трошат најмногу.

Истражувањето го спроведе интернет-платформата за африкански сафари „Сафари-букингс“, која анкетира 192 туристички оператори.

Прашањата се однесуваа на тоа која националност е најпристојна, која остава најдобар бакшиш, која троши најмногу за време на патувањата, која е најактивна и најсклона кон авантури, како и која најмногу ужива во храната.

Јапонците убедливо најпристојни

Јапонија се најде на првото место на листата со најпристојни туристи во светот, со 21,1 отсто од гласовите на анкетираните туристички оператори.

Следуваат Норвешка со 10,6 отсто и Швајцарија со 10,4 отсто, додека зад нив се туристите од Канада и САД. На последното место останаа италијанските туристи, кои 1,3 отсто од испитаниците ги процениле како најпристојни.

Сепак, европските туристи добија пофалби од еден од анкетираните оператори од компанијата „Имара турс Занзибар“.

- Многу наши гости од Европа се многу заинтересирани за однесувањето на дивите животни и често поставуваат детални прашања за животните и нивната заштита. Нивната љубопитност ги прави сафари-возењaта многу интересни - вели операторот.

Американците најмногу честат и најмногу трошат

Американците се познати по културата на давање бакшиш, па не изненадува што и според резултатите од оваа анкета се прогласени за туристи што оставаат најголем бакшиш.

Во таа категорија добија 29,5 отсто од сите гласови на туристичките оператори, што е далеку повеќе од сите други националности.

Како прилично великодушни се покажаа и туристите од Германија со 13,1 отсто, од Канада со 10 отсто и од Швајцарија со 8,6 отсто.

Американците се најдоа на првото место и кога станува збор за трошењето за време на патувањата. Добија 24 отсто од гласовите, додека зад нив повторно беа Германците и Канаѓаните, со по 12,8 отсто.

Германците бараат авантура, Индијците добра храна

Кога станува збор за најактивните туристи и оние што сакаат авантури, првите три места ги зазедоа туристите од европските земји.

На врвот се Германците со 21,1 отсто, а потоа Французите со 17,8 отсто и Холанѓаните со 11 отсто.

На другиот крај од листата се најдоа Британците и Индијците, кои добија по 4,5 отсто, додека Шпанците остварија само 4,3 отсто. Резултатите покажуваат дека туристите од тие земји се малку повеќе склони кон одмор и релаксација за време на патувањата.

Но, Индијците се први по нешто друго. Имено, меѓу туристите што патуваат поради храната, мнозинството од првите пет места ги зазедоа азиските националности, а Индија е на врвот на листата.

На второ место е Јапонија, трета е Франција, додека Кина го зазеде четвртото место.

Извор: Nova.rs
Фото: Magnific