Напредокот во намалувањето на бројот на случаи на рак на светско ниво е многу бавен, но нов тест на крвта предизвика необични нивоа на надеж.
Тестот на крвта наречен „Галери“, развиен од американската фирма „Грејл“, е најновиот метод што привлече светско внимание откако резултатите од раните испитувања беа опишани како „возбудливи“ од страна на истражувачите.
Се тврди дека тестот, кој моментално го тестира НХС (Национална здравствена служба на Велика Британија), може да детектира сигнали од 50 вида рак и правилно да ја идентификува болеста кај 62 проценти од луѓето што добиваат позитивен резултат. Исто така, се чини дека е многу точен во исклучување на ракот, со пријавена стапка на успех од 99,6 проценти кај оние што не страдале од болеста. На прв поглед се чини дека овие бројки претставуваат значаен чекор напред.
Студијата „Петфајндер 2“, во која учествуваа 23.160 лица на возраст над 50 години од САД и Канада, без претходна дијагноза на рак, ги даде бројките што влеваат надеж. Од 216 учесници што беа позитивни на тестот, кај 133 беше откриено дека имаат рак, што дава „позитивна предвидлива вредност“ од 62 проценти.
Оваа метрика одговара на прашањето: „Ако тестот ми е позитивен, каква е шансата да имам рак?“ Сепак, тоа исто така значи дека 38 проценти од позитивните резултати биле лажни аларми.
Колку често тестот избегнува лажно дијагностицирање на рак е исто така важно. Во таа смисла, тестот се покажал добро: 99,6 проценти од луѓето без рак добиле точен негативен резултат.
Значи, тестот „Галери“ може да стане корисен додаток на идните програми за скрининг, под услов негативните резултати да не се сметаат за дефинитивни од пациентите или лекарите.
Сепак, истражувачите констатираат дека тестот има ниско ниво на сензитивност, што значи дека многу видови рак сепак би биле пропуштени во нивната сегашна форма. Тестот е скап - 949 американски долари (723 фунти) во САД - и сè уште нема докази дека неговата широка употреба ги намалува смртните случаи од рак.
Оваа технологија може да биде чекор напред, но сама по себе не е решение.
Извор: sciencealert.com
Фото: Freepik