Железницата Аматерасу нуди 30-минутно возење прикажувајќи прекрасни знаменитости во префектурата Мијазаки.
Возот има некои чудни елементи што го прават симпатична глетка сама по себе, од неговиот отворен покрив и розови вагони до фактот дека спроводниците испуштаат меурчиња за време на возењето. Сега, железницата додаде уште поинтересна карактеристика. Го отфрли редовното гориво за да работи на одреден вид биодизел направен, меѓу другото, од остатоци од рамен-супа. Остава предизвикувачка арома во воздухот и помалку им штети на планинските предели и оризовите полиња низ кои минува.
Биодизелот се однесува на гориво за дизел-мотори направено од растително масло или животинска маст и нуди алтернатива на фосилните горива. Во региони како што се САД и Европа, биодизелот се произведува со растително масло од семе од репка, канола или соја, додека јапонската индустрија избегнува да се натпреварува со производителите на храна за ресурси и се насочува кон отпадно масло за јадење, па дури и остатоци од храна.
За префрлувањето, железницата Аматерасу соработувала со „Нишида логистик“, транспортна компанија од соседната префектура Фукуока, која е пионер на неколку видови биодизел за својот возен парк. Што се однесува до биодизелот што го користи овој воз, 90 отсто потекнува од масло за готвење, додека 10 отсто е од супа од тонкотсу рамен. Резервите доаѓаат од локалните ресторани. За да ја трансформира оваа масна супа во биодизел, компанијата го одвојува свинското месо од преостанатата супа од свински коски и потоа го рафинира со помош на специјален метод кој го избегнува стврднувањето. Единствената лоша страна на овој биодизел е тоа што може да се чува најмногу неколку месеци пред оксидацијата да почне да ја нарушува неговата ефикасност.
Во јули минатата година се одржаа првите тест-возења. Биодизел горивото можеше да го напојува возот, кој се состоеше од два вагона и тежина до 60 патници, без никакви проблеми — дури и на угорница. Иако е потребна редовна замена на филтерот за гориво, се вели дека цената е приближно иста како и на конвенционалното гориво. Покрај тоа, мирисот што го остава изгорениот биодизел ги натера посетителите да ги прашуваат кондуктерите на возот дали има ресторан во близина.
Извор:
Mymodernmet.com
Фото:
Wikimedia Commons