Јапонската авиокомпанија „Џапан ерлајнс“ вложи во американскиот стартап „Џетзиро“ за да го поддржи развојот на револуционерен патнички авион кој би можел да ја преполови потрошувачката на гориво. Станува збор за моделот „З4“, авион на иднината кој целосно го напушта класичниот дизајн на патничките летала.

За разлика од денешните патнички авиони, кои имаат тесен труп и одвоени крила, „З4“ го користи концептот на споен труп и крила. Во оваа аеродинамична конструкција крилата и трупот прават единствена целина, што значително го намалува отпорот на воздухот и овозможува речиси целата површина на авионот да создава потисок. Кај стандардните модели, од друга страна, трупот главно претставува дополнителна тежина и оптоварување за моторите.


Иако „Џапан ерлајнс“ сè уште не откри како ќе изгледа внатрешноста на кабината ниту колку простор ќе имаат патниците, објавени се првите прикази од надворешниот изглед на леталото. Авионот би требало да има долет од околу 9.920 километри, што е доволно за трансатлантски и транспацифички летови, како оние меѓу Токио и западната брег на САД.

- Нашата соработка со компанијата „Џетзиро“ на развојот на моделот „З4“ совршено се вклопува во нашата стратегија за одржливи иновации и целта до 2050 година да постигнеме целосна јаглеродна неутралност - изјави Такао Сузуки, директор за корпоративна стратегија во „Џапан ерлајнс“.

Тој додаде дека се надева оти оперативното искуство на оваа авиокомпанија ќе помогне во отворањето нова ера на поефикасен воздушен сообраќај.

Концептот на споена конструкција на трупот и крилата со децении претставува предизвик за воздухопловните инженери. Иако носи големи заштеди во потрошувачката на гориво, ваквите авиони се природно помалку стабилни во летот и бараат исклучително напредни компјутерски системи за управување, поради што до денес не заживеаја во комерцијалниот патнички сообраќај.

Извор: Nova.rs
Фото: Z4 Japan Airlines