Нова недела, нова рунда приказни за царини со кои Доналд Трамп има намера да заштити сè што е американско. По технолошката и автомобилската индустрија, тешката индустрија, градежништвото и разни други сектори, на ред за „заштита“ со царински давачки е филмската индустрија. Според Трамп, „американската филмска индустрија умира многу брзо“, Холивуд пропаѓа затоа што другите земји нудат разни стимулации за привлекување американски филмски работници и студија надвор од САД.
Тој сака да ја направи филмската индустрија „повторно одлична“
Тој ја нарече таквата практика „организиран напад од други земји“ и „закана за националната безбедност“, додавајќи дека тоа е и увоз на „пропаганда“. Поради сето ова, тој најави дека ќе се бори за американската индустрија на начинот на кој најдобро знае, со увозни царини. Тој иницирал воведување царина од дури 100 % за странски филмови, што веројатно би се однесувало на сите филмови произведени во странство, а кои се увезуваат и прикажуваат во САД.
Ова соопштение, како и сите негови најави за царини во последните недели, предизвикува нова рунда распродажби на берзите. Потоа следуваше нагло опаѓање на вредноста на акциите на големите американски медиумски компании, кои, меѓу другото, емитуваат содржини од странство.
На почетокот на неделата, акциите на „Нетфликс“ изгубија 4,7 % од својата вредност, додека „Дизни“ и „Ворнер брос“ забележаа пад помеѓу 2 % и 3 %. Акциите на „Парамаунт“ и „Комкаст“ паднаа за околу 1 %. Аналитичарите предупредуваат дека ваквите царини би можеле сериозно да ја загрозат профитабилноста на филмската индустрија, која честопати снима во странство токму за да ги искористи даночните олеснувања таму.
Останува нејасно како би функционирале царинските давачки во овој случај, бидејќи филмовите не се физички добра што едноставно се препродаваат. Администрацијата на Трамп ќе мора да утврди како да го процени филмот и на која вредност да воведе царини, односно да постави прагови за дозволениот удел на увезени услуги што се користат во филмот. Деталите за тоа на што точно би се однесувале царините сè уште не се познати, а ниту Белата куќа ниту Министерството за трговија не дало коментар за објавата на Трамп.
Нова царинска војна?
Американскиот портал „Варајати“ цитира британски филмски продуцент огорчен од овој потег:
- Ова нема смисла. Имплицира дека американските филмови треба да се снимаат во Соединетите Држави. Но, „Хари Потер“, „Господар на прстените“, „Шиндлеровата листа“, „Невозможна мисија“, „Гладијатор“, „Аватар“ и многу други се американски филмови што се снимани во странство од очигледни причини. Тоа е апсурдна најава без никакво значење или разбирање на раскажувањето приказни или креативни импулси.
Доколку другите земји во светот воведат реципрочни царини, што е исто така една од често споменуваните фрази на Трамп, тоа би можело да ги уништи холивудските студија, пишува „Волстрит џурнал“. Имено, американската филмска индустрија имаше трговски суфицит од 15,3 милијарди долари во 2023 година и оствари позитивен трговски биланс со секој поголем странски пазар. Затоа, царините за прикажување на холивудски филмови надвор од САД дополнително би ги намалиле приходите на студијата, кои веќе се еродирани од плаќањето увозни давачки за делови од продукцијата направени надвор од САД.
Извор: bug.hr
Фото: Freepik