Можеби изгледа неверојатно, но најголемите гробишта на китови во светот се наоѓаат, верувале или не, во пустина. Локалитетот Вади ал-Хитан во Египет е познат и како Долина на китовите бидејќи таму се пронајдени повеќе од 400 совршено зачувани скелети од праисториски китови.
Тие се слични на денешните китови во многу аспекти, а она што ги разликува од денешните е тоа што тие имале нозе и живееле на копно. Затоа оваа долина не е само археолошка сензација, туку и клуч за разбирање на тоа како китовите се претвориле во морски цицачи.
-Овие фосили претставуваат една од главните приказни за еволуцијата: појавата на китот како океански цицач, по претходен живот како копнено животно. Ова е најважното место во светот за демонстрирање на оваа фаза од еволуцијата - се вели во одлуката на УНЕСКО од 2005 година, со која Долината на китовите е вклучена на списокот на светско наследство.
Фосилите откриваат тајни
Фосилите пронајдени во Долината на китовите се археоцети, најстарите и најпримитивни фосилни китови од еоценот и миоценот. Многу од нив покажуваат преодни карактеристики помеѓу копнените цицачи и морските животни. Некои примероци дури имаат и стапала и прсти.
- Фосилите од ова место се најмладите археоцети, во последните фази на губење на задните екстремитети. Тие веќе ја покажуваат типичната аеродинамична форма на телото на современите китови, додека задржуваат одредени примитивни аспекти на структурата на черепот и забите - според УНЕСКО.
Фосилите во долината датираат од доцниот еоцен, период кога денешен Египет бил потопен под морето Тетида, пред приближно 55,8 и 33,9 милиони години. Климатските промени и повлекувањето на морето ја трансформирале таа област во она што сега е Сахара, но сувата клима е одговорна за исклучителното зачувување на скелетите.
Од 2005 година Долината на китовите е под заштита на УНЕСКО, а овој музеј на отворено може да се посети. Локацијата е лесно достапна, а центарот за посетители им ги обезбедува на туристите сите потребни информации. Истражувањата се во тек, а тука се пронајдени и остатоци од други животни од еоценот, како желки, риби, ајкули, крокодили, морски крави и школки.
Извор: punkufer.dnevnik.hr
Фото: YouTube screenshot