Цените на недвижностите во третиот квартал годинава во државава се зголемиле за 21,2 отсто, во споредба со истиот квартал од минатата година. Во периодот јули-септември, споредено со претходните три месеци, растот на цените на недвижностите е за 4,7 отсто, покажуваат податоците на Народната банка.
Во вториот квартал од годинава цените на становите забележаа зголемување од 16,5 отсто на годишно, односно од 6,8 проценти на квартално ниво, додека во првиот квартал исто така имаше раст на годишно ниво од 12,4 отсто , односно од 2,9 на квартално ниво.
Државниот завод за статистика претходно објави дека во септември годинава се издадени 318 одобренија за градење, за 28,2 проценти повеќе во споредба со септември лани. Од издадените одобренија за градење, 184 (57,9 проценти) се за објекти од високоградба, 35 (11 проценти) од нискоградба, а 99 (31,1 процент) се објекти за реконструкција. Во извештајниот период е предвидена изградба на 618 стана, со вкупна корисна површина од 56.849 квадратни метри. Најмногу станови ќе се градат во Скопскиот регион, 216, од кои 196 се во Општина Гази Баба. Меѓу општините со пoголем број планирани нови станови се и Струмица 87, Гевгелија 86, Гостивар 76, Дебар 40.
Извор: МИА