Сонуваме секоја ноќ, но често не можеме да се сетиме на соништата. Некои утра се сеќаваме на живописни детали, додека други на соништата се сеќаваме како низ магла. Но, што е со бојата? Дали повеќето луѓе сонуваат во боја или црно-бело?

Истражувањата покажуваат дека телевизијата и филмовите влијаат врз тоа како ги доживуваме соништата и што помниме кога ќе се разбудиме.

- Бидејќи сме навикнати на медиуми во боја, мислиме дека и соништата мора да бидат слични на гледање филм или јутјуб-видео. Тие медиуми се во боја, па ние истото го претпоставуваме и за соништата - вели Ерик Швитзгебел, професор по филозофија на Универзитетот во Калифорнија, Риверсајд.

Сепак, тоа не било секогаш така. До 60-тите години истражувачите мислеле дека луѓето главно сонуваат црно-бело. Мало истражување од 1942 година спроведено врз 277 студенти покажало дека 70,7 отсто ретко или никогаш не гледале боја во соништата. Дури 60 години подоцна, во ново истражување со 124 студенти, помалку од 20 отсто изјавиле дека ретко или никогаш не гледаат боја во соништата.

Други истражувања покажуваат слични резултати: луѓето родени пред појавата на телевизијата и филмовите во боја имаат поголема веројатност да сонуваат во монохроматски свет. Ова укажува дека начинoт на кој ги помниме соништата е под влијание на медиумската содржина што ја консумираме.

Исто така, не е само прашање на медиуми. Колку добро паметиме детали од соништата влијае врз тоа што ќе остане во сеќавање.

- Соништата се субјективни искуства, а единствениот начин да дојдеме до нив е преку сеќавањето по будењето - објаснува Михаел Шредл, раководител на лабораторијата за спиење во Германија.

Боите во соништата често се забораваат ако се очекувани, додека необичните или значајни бои можат да останат подолго во сеќавање. На пример, неонско розова банана во сон остава подлабок впечаток од вообичаената жолта.

Швитзгебел додава дека прашањето дали сонувавме во боја или црно-бело можеби е погрешно поставено. Менталната слика во сонот не мора да биде јасно во боја или црно-бела. Таа може да биде заматена и неодредена. Можно е медиумската содржина да влијае врз тоа како ги паметиме соништата наместо тие навистина да се во боја или црно-бели.

Извор: Livescience.com
Фото: Freepik