Софи Шол не е многу позната, но е легендарна личност од Германија со исклучителна животна приказна. Неодамна беше одбележана стогодишнината од нејзиното раѓање. Таа станала позната кога му се спротивставила на Адолф Хитлер, а за тоа платила со сопствениот живот.
Софи Шол била родена во 1921 г., а нејзиното детство било сигурно и безгрижно. Нејзиниот татко бил градоначалник на мал град во југозападниот дел од земјата, а таа израснала со пет браќа и сестри во лутеранско семејство, во кое христијанските вредности биле важни.
Хитлер владеел со Германија кога таа станала тинејџерка. На почетокот Софи и нејзиниот постар брат Ханс ја поддржувале Националсоцијалистичката партија. Ханс му се придружил на младинското движење за поддршка на Хитлер, а Софи била дел од сестринската организација на движењето.
Нивниот татко бил остар критичар на Хитлер. Братот и сестрата почнале да гледаат на владеењето на Хитлер со критички очи откако го забележале неговиот став кон Евреите. Тие почнале отворено да му се спротивставуваат кога тој ја окупирал Полска.
![](/images/news/2021/08/20210806-prikaznata-na-sofi-shol-studentkata-shto-mu-se-sprotivstavila-na-hitler-1.jpg)
Фото: Софи Шол/Wikipedia
Софи и Ханс студирале на Универзитетот во Минхен, каде што се дружеле со иста група пријатели. Ханс студирал медицина, а Софи уметност и биологија. Но во тоа време се живеело во диктатура, а Софи и Ханс биле решени да дадат отпор.
Ханс ја основал групата „Бела ружа“ заедно со пријател, а подоцна им се придружиле Софи, студенти и еден професор. Тие печателе и делеле летоци повикувајќи ги граѓаните да му укажат отпор на германскиот режим, осудувајќи го убиството на Евреите и барајќи крај на војната.
- Нема да нè замолчите - гласел еден леток.
- Германското име засекогаш ќе биде извалкано ако германската младина конечно не се крене, истовремено да се одмазди и откупи, да ги собори своите мачители и да пронајде нова духовна Европа - пишувало на шестиот леток, кој бил и последен на групата.
Ханс и Софи делеле летоци на универзитетот на 18 февруари 1943. Не е јасно зошто Софи се качила на последниот кат, кој гледал на отворениот атриум во главната зграда, и фрлила летоци одгоре. Додека летоците паѓале на земјата, домарот ја забележал и ја предал на тајната полиција.
Братот и сестрата биле ислушани и осудени на смрт. Тие одбиле да ги издадат другите членови на групата, но властите секако ги откриле. Сите нивни пријатели биле погубени во следните месеци.
![](/images/news/2021/08/20210806-prikaznata-na-sofi-shol-studentkata-shto-mu-se-sprotivstavila-na-hitler-2.jpg)
Фото: Софи Шол/Wikipedia
Утрото пред да биде погубена на 21-годишна возраст, Софи изјавила:
- Колку убав, сончев ден, а јас морам да одам. Каква врска има тоа што ќе умрам ако преку нас се разбудат и поттикнат на акција илјадници луѓе.
Овие зборови и нејзината храброст и понатаму се слават во Германија, каде што училишта и улици ги носат имињата на Софи и Ханс Шол.
Извор:
BBC