Д-р Никола Фокс е првата жена главен директор за наука на НАСА и вели дека тоа е најдобрата работа во светот.

Д-р Фокс е од Велика Британија и е поранешна директорка за хелиофизика во оваа агенција, а на крајот од февруари беше назначена за главен научник.

- Ова е работа од моите соништа, не би можела да бидам повозбудена. Кога растете во Хичин, Англија, навистина не сонувате дека еден ден ќе работите во НАСА и дефинитивно не изгледа како нешто што би можело да стане реалност - вели таа.

- Секое утро се будам во 4:30 и одам на работа полна со енергија - вели таа.

Во 2018 година таа почнала да работи во НАСА, во одделот за хелиофизика, каде што го надгледувала истражувањето на Сонцето и како неговите ветрови влијаат врз Земјата и другите планети.

Како што вели, имала среќа да се вработи.

- Работев на постдипломски истражувања на Кралскиот колеџ во Лондон, а на состанокот во Алјаска го презентирав сето она што дотогаш го открив. Моите колеги ме прашаа дали ќе бидам заинтересирана за постдокторска работа во НАСА - вели таа.

- Што и да ве интересира и она што срцето ви кажува дека треба да ве интересира, со тоа треба да се занимавате - додава таа.

Фокс вели дека нејзините родители биле апсолутно воодушевени поради новата работа.

- Кога бев директорка на одделот за хелиофизика, татко ми постојано сакаше да се фали дека ќерка му е директорка на НАСА. На почетокот се срамев и велев дека не е ништо важно и дека не сум директорка, а потоа сфатив дека работам за НАСА и дека нему тоа му е важно - објаснува таа.

Во 2021 година Никола Фокс ја доби наградата „Карл Сејган“ од Американското астронаутско друштво, а една година претходно доби Медал за извонредно лидерство доделен од НАСА.

Вели дека една од предностите на работата во НАСА е облеката што ја добивате.