Прочуените „Шпански скали“ (вкупно 136) од 18 век, кои водат до црквата „Тринита деј Монти“, се под заштита на УНЕСКО како светско културно наследство. Но, честопати се и место за одмор на туристите што го обиколуваат градот.

Сепак, според новите закони на градот, туристите не смеат да седат на скалите и сè почесто се наоѓаат во непријатна ситуација – полицијата да ги растерува оттаму. Покрај тоа, на туристите, исто така, им е забрането по славните скали да влечат куфери и торби со тркалца, како и детски колички.

Казната за седење на скалите е 250 евра, а 400 евра ќе платите доколку ги извалкате или оштетите.

Слични мерки се во сила и во Венеција, каде што полицијата патролира околу Плоштадот на свети Марко и другите културни споменици. Таму туристите не смеат да јадат или „кампуваат“ на скалите и околу спомениците, ниту, пак, смеат со уста да ги допираат цевките на фонтаните од каде што тече вода.