Само 13 отсто од жените во земјава во истражување на УНИЦЕФ се изјасниле дека користат модерни контрацептивни средства, само 1,6 отсто користат орална контрацепција, а 2 отсто интерутерална влошка. Над 17,2 од паровите би сакале да ги користат, но не знаат каде да се обратат, ни што би можеле да користат. Работите треба да се менуваат во насока на тоа дека контрацепцијата не е само заштита од несакана бременост, туку и остварување на правата, давање избор и моќ на жената, рече претседателот на Здружението на гинеколози и опстетричари и национален координатор за сексуално и репродуктивно здравје, Глигор Тофоски.
Тој додаде дека податоците на Институтот за јавно здравје, пак, покажуваат дека е многу низок процентот на жени и адолесценти што побарале прв совет за планирање семејство и користење контрацепција. Тоа го направиле само 1,2 отсто од жените во репродуктивниот период и само еден отсто од адолесцентките.
- За жал, употребата на контрацепцијата е многу ниска во однос на географскиот регион во кој се наоѓаме и нивото на развој на земјата и општеството - рече тој на прес-конференцијата по повод објавувањето на Извештајот на УНФПА за состојбата на населението во светот 2019, кој е со наслов „Недовршена работа – во потрага по права и избор ЗА СИТЕ“.
Фото: МИА
Додаде дека за да се надминат ваквите состојби, потребни се континуирани кампањи, обуки на семејните лекари и патронажните сестри, државна поддршка на ранливите категории граѓани, не само на социјална основа, туку и младите и адолесцентите, едукација на момчињата…
Податоците со кои тој располага покажале дека еден долар инвестиран во оваа цел заштедува 1,47 долар во здравствениот систем. Ова, заедно со тестирањата и скрининзите за рано откривање сексуални заболувања може да заштеди и до седум долари.
Помошник-претставникот на канцеларијата на УНФПА во државава, Афродита Шаља-Плавјанска, вели дека контрацепцијата е право на избор на жената, со цел таа да може да го планира својот живот, но и да се заштити од сексуално преносливи болести.
Фото: МИА
Таа рече дека треба да овозможи и реализирање на зацртаните цели за нула мајчинска смртност, но и нула за штетни практики за родово базирано насилство, рани бракови и бремености.
Фото: МИА
Извештајот одбележува два важни настана во областа на репродуктивното здравје – 50 години од основањето на УНФПА (UNFPA50) и 25 години од одржувањето на Меѓународната конференција за население и развој (ICPD25).
- Со ова се поставија постулатите на целите на УНФПА, како што се севкупен пристап до услуги за сексуално и репродуктивно здравје, вклучително и семејно планирање и методи на контрацепција, намалување на мајчина и новороденечка смртност, превенција и третман на сексуално преносливи инфекции, како и јакнење на улогата на жената и девојчињата во сите сфери на општеството - информира Канцеларијата на Фондот за население на Обединетите нации.
Извор: МИА