На оваа визуализација се рангирани повеќе од 150 земји според просечниот број на сработени часови во една недела во 2025 година. Додека глобалниот просек е околу 38,7 часа неделно, јазот меѓу нациите што работат најмногу и најмалку е речиси 30 часа.

Бутан е на врвот

Годинава Бутанците се истакнуваат како највредни со просечни 54,5 сработени часови неделно. Многу економии во Јужна и Југоисточна Азија исто така се на врвот на листата, а меѓу нив се и Обединетите Арапски Емирати со 48,4 часа, Пакистан со 47,5 и Индија со просек од 45,8 работни часа неделно.

Во Европа се работи најмалку

На другата страна на спектарот, Западна и Северна Европа ги имаат едни од најкратките работни недели. Холандија со просечни 26,8 работни часа неделно, Норвешка со 27,1 и Данска со 28,8 - сите под 30 часа неделно. Овие земји имаат бенефит од силната продуктивност, големата автоматизација и дарежливите заштити на работниците. Пократкото работно време често се поврзува со повисоки животни стандарди и подобар баланс меѓу работата и животот.

Каде се Македонија и земјите од регионот?

Интересно е позиционирањето на земјите од Балканот на листата, особено затоа што просечниот број на работни часови на неделно ниво од сите земји во регионот е најголем, ни помалку ни повеќе, во Црна Гора. Таму луѓето во просек работат по 44,2 часа неделно.

Следна е Албанија со просек од 41,4 работни часа неделно, а потоа следува Босна и Херцеговина со 40,8 часа. Србите просечно работат по 38,4 часа неделно, а Бугарите по 38,2. Малку повредни од нас се Грците, чиј просек е 37,8 часа неделно, а по нив сме ние Македонците со просек од 37,5 сработени часа неделно.

Зад нас од регионот се само Хрватите со 34,3 работни часа неделно и Словенците со 33,7.

Извор: Visual Capitalist
Насловна фотографија: Freepik