Никогаш не било полесно да се дојде до информации, но истовремено како никогаш да не било потешко да се задржи вниманието на една работа.

Телефонот, социјалните мрежи, пораките, е-поштата, вестите што се менуваат од минута во минута и работата која често не завршува ни кога ќе ја напуштиме канцеларијата постојано бараат дел од нашето внимание. Истражувањата покажуваат дека проблемот можеби не е во тоа што способноста за концентрација ни е драстично ослабена, туку во тоа што сме опкружени со огромен број работи што се обидуваат да ни го одвлечат вниманието.

Затоа на многумина им се случува парадоксална ситуација: имаме повеќе алатки и информации од кога било, а кога треба да седнеме и целосно да се посветиме на една задача, концентрацијата многу брзо исчезнува.

Една едноставна техника, за која се потребни само шест минути, последниве месеци го привлече вниманието токму затоа што се обидува да отстрани неколку од најчестите пречки за фокус пред работата воопшто да започне.

Станува збор за таканаречената „метода 3-2-1“.

Ја популаризира Ерин Мерил Мекгерк, авторка на содржини и претприемач која на социјалните мрежи зборува за учење, дисциплина, продуктивност и концентрација.

Оваа техника ја опишува како нејзин омилен начин да се подготви за периоди во кои ѝ е потребна целосна концентрација, а вели дека ја користи и неколку пати дневно.

Што е „методата 3-2-1“?

Принципот е многу едноставен.

Првите 3 минути се наменети за релативно интензивна физичка активност. Тоа не мора да биде вистински тренинг - целта е само да се движи телото, да се забрза пулсот и да се потроши дел од физичката напнатост поради која често ни е тешко мирно да седиме и да работиме.

Може тоа да бидат склекови, брзо качување по скали, скокање или некоја друга кратка активност што бара малку повеќе енергија.

Следуваат 2 минути во кои на хартија треба да се запише сè што во моментот ви се врти низ главата.

Обврски што не смеете да ги заборавите, нешто што ве загрижува, порака на која треба да одговорите, идеја што ви се појавила или која било друга мисла што подоцна би можела да ја прекине работата.

Поентата не е да направите совршена листа на обврски, туку да ги исфрлите мислите од главата и да ги ставите на хартија за да не морате постојано да ги чувате во работната меморија.

Последната минута се користи за прецизно планирање на она што ќе го сработите.

Наместо неодредена цел како „сега ќе работам“, потребно е да одлучите што точно треба да се заврши во текот на наредниот период на концентрација.

На пример: да се прочитаат одреден број страници, да се напишат 2 страници текст, да се заврши презентација или да се анализира конкретен документ.

3 минути движење, 2 минути запишување мисли и 1 минута планирање - вкупно 6 минути.

- Можеби ќе помислите дека 6 минути е многу, но ако тие 6 минути ви овозможат потоа да бидете концентрирани 3 часа, тогаш се исплатат - објаснува Мекгерк.

Како може да помогне оваа техника?

Идејата на методата е пред почетокот на работата да се отстранат три различни извори на одвлекување внимание.

Први се телефоните и другите уреди - навиката постојано да го проверуваме екранот може да стане речиси автоматска.

Втор проблем е физичкиот немир - кога телото има потреба од движење, тешко е да се очекува дека мозокот без проблем ќе остане насочен кон една задача. Затоа методата започнува со кратка физичка активност, идејата е дел од таа енергија прво да се потроши.

Третата пречка ја сочинуваат мислите кои постојано се појавуваат додека се обидуваме да работиме -двете минути запишување служат токму за тоа, мозокот повеќе да не мора да ја чува секоја од тие информации.

Последната минута решава уште еден проблем - нејасна цел.

Многу е полесно да одлутаме кога ќе седнеме зад бирото без јасна претстава што точно се обидуваме да завршиме. Прецизно дефинирана задача му дава на мозокот конкретна мета кон која треба да го насочи вниманието.

Затоа „методата 3-2-1“ не е трик кој преку ноќ ќе му овозможи некому совршена концентрација. Нејзината предност е во тоа што за само неколку минути се обидува да го отстрани физичкиот немир, менталниот метеж и нејасниот план - три работи кои често го уништуваат фокусот уште пред да започне сериозната работа. 

Извор: Nova.rs
Фото: Magnific