Сè поголем број француски возачи се обидуваат да го заменат дизел-горивото со масло од маслодајна репка поради разликата во цената, но експертите предупредуваат дека таквата практика може да оштети одредени мотори и претставува царински прекршок.

На социјалните мрежи последниве денови вирално се шири снимка од возач кој во резервоарот на автомобилот истура масло за јадење, чија цена изнесува околу 1,45 евра за литар, додека цената на дизелот на некои француски пумпи достигнува речиси 3 евра, пренесува францускиот портал „Ла Воа ди Нор“.

Една Французинка изјави дека веќе 15 години користи отпадно масло за јадење за погон на својата лимузина „мерцедес“. Маслото, како што наведува таа, претходно го таложи и го филтрира, а го набавува од угостители и сопственици на подвижни угостителски објекти.

Експертите предупредуваат дека маслото од маслодајна репка ги нема истите физички својства како дизелот и може да доведе до таложење на наслаги во дизните и пумпата за вбризгување.


Кај современите дизел-автомобили, електронскиот систем за управување со моторот прецизно ја регулира количината на гориво што се вбризгува во моторот. Промената на карактеристиките на горивото може да доведе до неправилно дозирање, намалување на силата и проблеми со забрзувањето, предупреди таа.

Француската царинска служба предупредува дека користењето растителни масла како гориво претставува царински прекршок. Покрај паричната казна, возилото може да биде запленето.

Според наводите на регионалната царинска управа, можноста за користење растителни масла како гориво законски е предвидена само за одредени професионални корисници во земјоделството, градежништвото и транспортот кои имаат сопствени флоти на возила.