Хосе Флорес од Костарика, кој живее во скромна дрвена куќа во Сардинал, би сакал заедно со своето семејство да добие потврда дека е најстарата личност на светот.

Неговото семејство и официјалните документи наведуваат дека има 119 години, што би значело дека е најстарата личност на светот, иако меѓународната потврда за неговиот датум на раѓање сè уште не е завршена бидејќи експертите ги прегледуваат историските документи.

Сардинал е дел од сината зона

Сардинал е гратче на полуостровот Никоја, една од петте светски регии познати како сини зони, во кои луѓето по правило живеат подолго и поздраво и имаат поголеми шанси да доживеат 100 години. Својата долговечност ѝ ја припишуваат на водата богата со калциум и магнезиум, исхраната што се заснова на пченка и грав, физичката работа и силните семејни и општествени врски.

Тајната на долговечноста

Хелен Флорес, внука и негувателка на Хосе, изјави дека нејзиниот дедо, кој целиот живот работел на село, сега живее мирно и среќно. Одвреме-навреме се присетува на настани од својот живот, ќе каже по некоја шега и вели дека една од тајните на неговата долговечност е неговото семејство.

„Без љубов, без нежност и без грижа, тој денес немаше да биде овде“, вели таа.

Според Хорхе Виндас, основач на здружението „Сина зона“ на полуостровот Никоја, кое ја проучува долговечноста во тој регион, постојат и други фактори што помагаат да се објаснат случаите на долговечност како оној на Флорес.

Според личната карта, Флорес е роден на 11 јули 1907 година.

- Семејството и општествените врски се на прво место, заедно со духовноста и силната вера на тие луѓе, кои се многу физички активни - вели Виндас. Тој додаде дека се хранат здраво и водат мирен живот со малку стрес.


Виндас вели дека здружението поседува историски документи што сè уште треба да бидат потврдени од меѓународни организации, вклучително и Гинисовата книга на рекорди.

-Имаме голем број документи, од изводот од матичната книга на родените и потврдата за крштевање до документи од подоцнежниот период од неговиот живот, кога веќе бил татко и потоа. Кога целата документација ќе биде прегледана, се надеваме дека ќе биде потврдена и дека наскоро ќе имаме добри вести - објаснува тој.

Флорес имал осум деца, а денес има 23 внуци, 25 правнуци и една праправнука.

Најстарата жена на светот