Пентагон се соочува со тешкотии при регрутирањето за воен рок бидејќи една третина од Американците имаат прекумерна тежина што им пречи да ги вршат должностите во американската армија.
- Речиси една третина од младите Американци денес се со тежина над нормалата за да служат во вооружените сили - изјави пензионираниот генерал Семјуел Ибсон, кој деновиве го претстави и извештајот на стручната група „Совет за силна Америка“, што се однесува на пешадијата.
Според документот, проблемот со тежината ги засега и војниците што се веќе на служба.
За споредба, во 2015 година 7,8 отсто од регрутите имале прекумерна тежина, што, пак, е за 73 проценти повеќе од 2011. По тој повод, Пентагон одреди построги критериуми за физичкото здравје и состојбата на активните војници.
- Повеќето проблеми на Америка се решаваат на локално ниво. И овој проблем треба да биде решен на тој начин - изјави американскиот секретар за одбрана Џејмс Матис.
Според податоците, најголем проблем со прекумерната тежина кај младите што се пријавуваат за служење војска, и се на возраст меѓу 17 и 24 години, има американскиот главен град Вашингтон (78 отсто).
Извор: МИА