Луѓето со позитивно гледиште на светот веројатно поретко ќе се соочат со срцев или мозочен удар отколку песимистите, а веројатно и подолго ќе живеат, покажува неодамнешна анализа.

Во анализата, која се заснова на постојни истражувања, научниците истражиле податоци од 15 студии во кои биле вклучени помалку од 230.000 луѓе, а следени се во просек 14 години.

Со текот на времето најоптимистичните лица имале за 35 отсто помали шанси од најпесимистичните за срцев или мозочен удар, а 14 отсто помали шанси да умрат од некоја друга причина, објавено е во медицинското списание „ЈАМА нетворк опен“.

- Резултатите посочуваат дека позитивното и негативното размислување не само што влијаат врз квалитетот на живот туку може да бидат поврзани и со здравјето - истакна Алан Розански, водечки автор на студијата.

Оптимистите имаат позитивни здравствени навики кои им помагаат да живеат подолго, објаснува Розански. Тие јадат подобро, повеќе вежбаат и помалку пушат од песимистите, а имаат и подобри начини за справување со проблемите, што им помага да бидат проактивни на полето на здравјето и да минуваат низ тешките времиња без да ги менуваат навиките.

Розански додава дека песимизмот, од друга страна, може да поттикне почести воспаленија и да ги направи луѓето поподложни на развој на метаболитички нарушувања, кои можат да го скратат животот.

Додека многу студии во текот на минатите неколку децении ги поврзуваа стресот и промените на расположението со зголемениот ризик од срцеви болести, овие резултати нудат свежи докази дека гледањето на животот може да влијае врз здравјето на срцето.

- Оптимизмот долго време се поврзува со подобри резултати на училиште и на работните места поврзани со продажба, спорт, политика и социјални односи, но тој е и важно здравствено прашање кое досега не беше доволно истражено - истакна Розански.