„Рајанер“, најголемата авиокомпанија во Европа и најбрзорастечкиот превозник во Албанија, ќе отвори нова база на аеродромот во Тирана, во април 2026 година. Таму ќе бидат стационирани три авиони „Боинг 737-800“, што претставува инвестиција вредна 300 милиони долари.
Од компанијата велат дека овој проект ќе поддржи повеќе од 3.000 работни места, вклучувајќи околу 100 нови, добро платени позиции за пилоти и кабински персонал.
Десет нови линии и зајакнување на постојните
Во летната сезона 2026 година, „Рајанер“ ќе има повеќе од 450 неделни летови од Тирана до вкупно 33 дестинации во 13 земји. Меѓу нив се десет нови линии до Бирмингем, Даблин, Милано (Малпенза), Малта, Неапол, Пескара, Познањ, Трст, Торино и Верона. Компанијата, исто така, ќе го зголеми бројот на летови на девет постоечки линии, вклучувајќи ги Бари, Лондон, Прага, Стокхолм и Варшава.
Со отворањето на базата, „Рајанер“ планира да го зголеми капацитетот на своите бази на аеродромот во Тирана на околу четири милиони патници годишно. Во следните пет години, компанијата има намера, доколку се одржат ниски такси и поволни услови за пристап, да го зголеми бројот на авиони на база на шест, да отвори повеќе од 20 нови рути и да превезува над пет милиони патници годишно до 2030 година.
Извршниот директор на „Рајанер“, Мајкл О’Лири, истакна дека од влегувањето на албанскиот пазар во ноември 2023 година компанијата бележи силен раст и дека новата база е логичен чекор кон понатамошно проширување.
-Оваа инвестиција не само што ќе донесе нови дестинации, туку ќе создаде и илјадници работни места и ќе придонесе за развој на туризмот во Албанија - изјавил О’Лири.
Директорот за операции на аеродромот во Тирана, Пјервиторио Фараби, нагласи дека одлуката на „Рајанер“ е резултат на значителни инвестиции во инфраструктура, вклучувајќи го продолжувањето на пистата, проширувањето на местата за полетување, реконструкцијата на маневрирачките површини и тројно зголемување на капацитетот на терминалот.
-Подготвени сме да обезбедиме брз и сигурен процес на обработка на патници и со нетрпение очекуваме Тирана да стане нова база во мрежата на „Рајанер“ - додаде Фараби.
Ова ќе биде првата постојана оперативна база на „Рајанер“ во Албанија, што означува нов период во развојот на воздушниот сообраќај на земјата и нејзината поврзаност со остатокот од Европа.
Фото: Facebook