Визионерот и икона во светот на технологијата, Стив Џобс, бил познат по своето креативно размислување надвор од стандардните рамки. Биографот Волтер Ајзексон забележал дека долгите прошетки му биле омилен начин за сериозен разговор. Дизајнерот Џони Ајв, кој работел со Џобс повеќе од 10 години, се присетува дека голем дел од времето го поминувале пешачејќи во тишина.
Веројатно Џобс разбирал нешто што повеќето луѓе не го сфаќале: многу истражувања покажале дека пешачењето ги поттикнува креативноста и когнитивните функции. Движењето му помагало да најде креативни решенија за тешки проблеми, а невронаучник вели дека секој може да има корист од неговото 10-минутно правило и да стане поефикасен и покреативен.
Што претставува 10-минутното правило?
Миту Сторони, невронаучник од Универзитетот „Кембриџ“ и автор на книгата „Хиперефикасен: Оптимизирај го мозокот за да го трансформираш начинот на работа“ истакнува дека кратката прошетка помага да се најдат брзи решенија.
Правилото е едноставно: ако не можете да го решите проблемот на работа во рок од 10 минути, оставете го работното место накратко и излезете на кратка прошетка.
- Имам клиенти кои го применуваат ова правило. На пример, ако еден извршен директор не успее да го реши проблемот за 10 минути, станува и оди на прошетка - објаснува Сторони.
Причината е што физиологијата на телото може да ја промени работата на мозокот.
Што се случува кога пешачите?
- Пешачењето прво го усогласува мозокот со физиологијата на телото. Второ, ве држи во правилна ментална состојба на внимание и не дозволува да заспиете или да се изгубите во телефонот. И бидејќи околината се движи додека пешачите, вашето внимание не може да се фиксира на ништо, туку го истражува проблемот од различни агли - објаснува Сторони.
Со пешачењето не е можно мислите да ви се „вртат во круг“, што го доведува мозокот во оптимална состојба за решавање проблеми.
- Телото и мозокот се толку поврзани што можете да го искористите телото за да го поттикнете мозокот во оптимална состојба за различни видови работа - додава Сторони.
Што велат истражувањата?
Истражување од „Стенфорд“ од 2014 година покажало дека пешачењето ја зголемува креативноста. Испитаниците биле за 60 отсто покреативни додека пешачеле во споредба кога седеле.
Самото пешачење, а не околината, било главниот фактор кој ја подобрувал креативноста. Поголемиот креативен излез доведува до подобро решавање проблеми и поголема продуктивност.
Прошетките на отворено се поврзани и со зголемена когнитивна функција, побрзи реакции и подобра концентрација во споредба со пешачење во затворен простор или седење, според истражување објавено во „Нејчр сајентифик рипортс“.
Кратките микропаузи, во кои е вклучено и пешачењето, го подобруваат чувството на благосостојба, го намалуваат заморот и ја зголемуваат енергијата, што особено ја подобрува продуктивноста кога станува збор за креативни и канцелариски задачи.
Извор:
Financialepxress.com
Фото: Screenshot/YouTube