Трендовите во облеката доаѓаат и си одат, но во некои случаи не остануваат предолго. Со децении модната индустрија и нејзините следбеници се повикуваат на таканареченото „правило од 20 години“, кое посочува дека општеството е склоно да види враќање на одредени стилови во одредени интервали. Сепак, без никакви цврсти податоци што би го поткрепиле тврдењето, тоа „правило“ долго време беше хипотеза.
Но, математичари од Универзитетот „Нортвестерн“ извршиле анализа на женската облека во период од 160 години и потврдуваат дека модните трендови се појавуваат на секои 20 години.
- Според нашите сознанија, ова е првпат некој да развие толку обемна и прецизна база на податоци за модни мерки во текот на повеќе од еден век - истакнала водечката авторка на студијата, Ема Зајдела.
За да дојдат до своите заклучоци, истражувачите прво составиле збир на податоци од околу 37.000 парчиња облека, преку комбинирање на „Архивата на комерцијални модели“ од Универзитетот во Род Ајленд, со слики од колекции на модни писти кои датираат од 1869 година. Потоа ја поделиле облеката врз основа на специфични карактеристики, вклучувајќи ги рабовите, позиционирањето на струкот и деколтето, за да го проценат секој пример во мерливи, нумерички термини. Потоа изградиле нов математички модел за да го анализираат движењето помеѓу новите и попрепознатливите модни дизајни. Според Зајдела и нејзините колеги, доказите јасно покажуваат дека модната индустрија рутински рециклира одредени теми и дизајни на секои две децении.
Во основа, модната индустрија постојано се движи помеѓу оригиналноста и традицијата. Откако еден стил на облека ќе стане премногу популарен, дизајнерите почнуваат да ја менуваат новата облека за да се издвои, а сепак да биде посакувана.
- Со текот на времето, овој постојан притисок да се биде различен од минатото предизвикува стиловите да се движат напред-назад. Системот суштински сака да осцилира, а ние ги гледаме тие циклуси во податоците - истакнал математичарот и автор на студијата Даниел Абрамс.
Најочигледен пример за овој модел е линијата на здолништето. Повеќе од еден век модата на здолништето се менувала помеѓу кратки и долги стилови. Фустаните со кратки линии биле многу популарни во 20-тите години, но им го отстапиле местото на подолгите дизајни во 40-тите и 50-тите. До 60-тите години трендот се вратил на уште пократки опции, како што е мини-здолништето.
Сепак, и покрај оваа математичка анализа, правилото од 20 години можеби нема да трае подолго. Почнувајќи од 80-тите, наизменичноста помеѓу кратко и долго здолниште почнала да се распаѓа бидејќи и двете опции останале популарни.
- Во минатото имаше две опции - кратки фустани и долги фустани. Во поново време има повеќе опции: навистина кратки фустани, фустани долги до подот и фустани со средна должина - вели Зајдела.
Само времето ќе покаже дали правилото од 20 години ќе остане во сила.
Извор: popsci.com
Фото: Freepik