Во песочните дини во регионот Негев, на југот на Израел, се пронајдени осум јајца од ној стари меѓу 4.000 и 7.500 години. Она што го прави ова откритие многу интересно е фактот дека јајцата лежеле непосредно до остатоците на древно огниште, што упатува на тоа дека биле наменети за исхрана, а не за ритуали.

Реткото откритие го пронајде тим на Израелската управа за антиквитети на локалитет за кој се верува дека некогаш им служел како камп на пустинските номади. Покрај јајцата се пронајдени и алатки од кремен, изгорени камења и керамички фрагменти.

Археологот Лорен Дејвис ја истакна важноста на откритието и објасни зошто археолозите веруваат дека се работи за организирано прибирање храна.

- Оваа збирка на јајца од ној е навистина посебно откритие. Положбата на јајцата покажува дека не завршиле таму случајно, туку се работи за намерно собирање јајца. Едно од јајцата е пронајдено точно во огништето, што дополнително ја потврдува претпоставката дека било наменето за исхрана - објасни археологот.


Д-р Амир Горзалчани од Израелската управа за антиквитети појасни колку биле вредни јајцата од ној во античкиот свет.

- Јајца од ној наоѓаме на археолошките наоѓалишта во погребни контексти, како луксузни предмети и шишиња за вода - рече тој. Но истовремено нивната прехранбена вредност била огромна. 
Зошто нема коски од ноеви?

Интересно е што и покрај честите откритија на јајца од ној на археолошките локалитети, речиси никогаш не се пронајдени коски од овие големи птици. Според Горзалчани, тоа би можело да значи дека луѓето го избегнувале ловот на ноеви.