Локално уловена риба во реките и езерата може да биде главен извор на хемикалии, предупредува ново истражување.

Јадењето една слатководна риба фатена во река или во езеро во САД е еквивалент на едномесечно пиење вода контаминирана со токсични хемикалии.

Невидливите хемикалии наречени PFAS првпат биле развиени во 40-тите години за да се спротивстават на вода и топлина, а сега се користат во предмети како што се нелепливи тави, текстил, пени за гаснење пожар и пакување храна.

Но, неуништливоста на PFAS значи дека загадувачите со текот на времето се акумулираат во воздухот, почвата, езерата, реките, храната, водата за пиење, па дури и во нашите тела.

Сè поголеми се повиците за построга регулатива за PFAS, кои се поврзани со низа сериозни здравствени проблеми, вклучувајќи оштетување на црниот дроб, висок холестерол, намалени имунолошки реакции и неколку видови рак.

За да ја откријат контаминацијата со PFAS кај локално уловените риби, истражувачи анализирале повеќе од 500 примероци од реки и езера низ САД помеѓу 2013 и 2015 година. Просечното ниво на PFAS во рибата беше 9.500 нанограми на килограм.

Вкупното ниво на PFAS кај слатководните риби беше 278 пати повисоко од она што беше пронајдено кај комерцијално продаваните риби.

- Повеќе не можам да гледам риба без да размислувам за контаминација со PFAS - вели Дејвид Ендрјус, висок научник во непрофитна работна група за животна средина, кој го водеше истражувањето.

- Ова ме лути затоа што компаниите што го создадоа и користат PFAS го контаминираа светот, а не одговараат за тоа - додава Ендрјус.

Патрик Бирн, истражувач за загадување на животната средина на Универзитетот „Џон Мурс“ во Велика Британија, изјави дека PFAS е веројатно најголемата хемиска закана со која се соочува човечката раса во 21 век.

- Ова истражување е важно затоа што ги дава првите докази за широко распространето пренесување на PFAS директно од рибите на луѓето - вели тој.

Истражувањето доаѓа откако Данска, Германија, Холандија, Норвешка и Шведска поднесоа предлог за забрана на PFAS до Европската агенција за хемикалии на ЕУ.

Предлогот доаѓа откако петте земји открија дека PFAS не се соодветно контролирани и дека е потребна регулација.

Извор: Phys.org
Фото: Freepik