Старосната граница за заминување во пензија во Европа расте бидејќи луѓето живеат подолго, но меѓу државите постојат големи разлики во тоа колку се очекува дека луѓето ќе живеат по пензионирањето.

Според податоците на ОЕЦД, во 2024 година старосната граница за заминување во пензија во Европската Унија изнесуваше 64,7 години за мажи и 64 години за жени.

Бидејќи луѓето стекнуваат право на пензија кога ќе ја достигнат пропишаната старосна граница, „Јуроњуз бизнис“ ги користеше податоците за очекуваниот животен век во моментот на заминување во пензија во секоја земја.

Тоа значи дека доколку ги исполнуваат и другите услови, како што е потребниот број години стаж, можат да очекуваат дека ќе примаат пензија во текот на тој број години. Секако, дел од пензионерите продолжуваат да работат и откако ќе ја достигнат старосната граница за пензионирање.

Мажите во ЕУ по пензионирањето во просек можат да очекуваат уште 18,4 години живот, додека кај жените тој период е 21,8 години. Податоците се засноваат на очекуваниот животен век во моментот на заминување во пензија, според податоците на „Евростат“ и ОЕЦД за 2024 година.

Кај мажите, очекуваниот број години во кои ќе примаат пензија се движи од 14,7 години во Бугарија и Унгарија до дури 27,3 години во Турција.

Во ЕУ, Луксембург го има најдолгиот период - мажите таму можат да очекуваат дека ќе примаат пензија 22 години.

Разликата главно произлегува од два фактора: различните старосни граници за пензионирање и различниот очекуван животен век.

Мажите пензионери во Грција можат да очекуваат 21 година во пензија, во Франција и Словенија по 20,7 години, во Швајцарија 20,4, а на Малта 20,2 години.

Очекуваниот период поминат во пензија над просекот на ЕУ од 18,4 години го бележат и Кипар со 19,8 години, Шведска со 19,4, Португалија со 19,3, Белгија со 19,1, Ирска и Обединетото Кралство со по 19, Австрија со 18,8 и Финска со 18,7 години.

Германија има најмалку години во пензија меѓу големите економии

Податоците покажуваат дека, со исклучок на Германија, за мажите во другите големи европски економии се очекува дека во пензија ќе поминат повеќе време од просекот на ЕУ.

Во Германија тој период е за 1,1 година пократок од просекот на Унијата, што создава значителна разлика во споредба со  Франција, Италија и Шпанија.


Кај жените, очекуваниот период поминат во пензија во ЕУ изнесува 21,8 години, додека се движи од 18,6 години во Унгарија до 34,5 години во Турција.

Во Луксембург тој период е подолг од 25 години.

Се очекува и дека жените во Словенија, Грција, Франција, Шпанија, Швајцарија, Малта, Италија, Португалија, на Кипар и во Финска ќе поминат повеќе од 22 години во пензија, односно толку долго ќе примаат пензија.

Кај жените, под просекот на ЕУ се наоѓа не само Германија, со 20,3 години, туку и Обединетото Кралство, со 21 година.

Покрај Унгарија, жените би требало да поминат помалку од 20 години во пензија и во Бугарија, каде што тој период е 18,8 години, Романија 19,1, Холандија 19,2, Хрватска 19,6, Данска 19,7, како и Летонија и Исланд со по 19,8 години.

Старосна граница за пензионирање

Турција во 2024 година значително се издвојува меѓу 32 европски земји бидејќи моменталната старосна граница за заминување во пензија е 52 години за мажи и 49 години за жени.

Ако се исклучи Турција, старосната граница за заминување во пензија во другите земји од листата се движи од 62 до 67 години за мажи и од 60 до 67 години за жени. Во ЕУ, старосната граница е 64,7 години за мажи и 64 години за жени.

Се очекува мажите што ќе ја достигнат старосната граница за пензионирање да живеат до 83,1 години, додека кај жените очекуваната возраст е 85,8 години.

Жените во пензија во просек минуваат 3,4 години подолго

Во просек се очекува дека жените во ЕУ ќе поминат 3,4 години подолго во пензија од мажите. Таа разлика се движи од 1,6 години на Исланд до 7,2 години во Турција.

Разлика од четири или повеќе години се бележи и во Естонија, Литванија, Летонија, Бугарија, Романија и Полска. Сепак, стапките на учество на населението на пазарот на трудот во тие земји се релативно пониски.

Уште еден важен показател е разликата во пензиите меѓу мажите и жените. Во земјите на ОЕЦД жените во просек примаат за 23 отсто пониски пензии од мажите, додека во Обединетото Кралство разликата достигнува 37 отсто.

Данците во пензија дури со 70 години, на Балканот и понатаму со 65

Просечната вистинска возраст во која луѓето го напуштаат пазарот на трудот може да се разликува од официјалната старосна граница за заминување во пензија. Така, во ЕУ старосната граница за мажи е 64,7 години, додека просечната возраст за пензија е 63,8 години. Кај жените просечната возраст за заминување во пензија е 62,9 години, во споредба со старосната граница за пензионирање од 64 години.

Најизразена разлика меѓу формалната старосна граница за пензионирање и вистинското излегување од пазарот на трудот е забележана во Турција.

Иако мажите во таа земја можат да одат во пензија со 52 години, во пензија заминуваат со 60,8 години.

Кај жените, соодветната возраст е 49 и 60,5 години.

Ако се смета периодот по вистинското излегување од пазарот на трудот, очекуваниот број години би бил 18,2 за мажи и 22,6 за жени во Турција.

Тоа покажува дека иако Турција го има најголемиот очекуван број на години поминати во пензија кога се набљудува официјалната старосна граница, тој период би бил значително пократок доколку се пресметува вистинската возраст на излегување од пазарот на трудот.

Извор: Forbes.vijesti.me
Фото: Magnific