Лондон е еден од оние градови каде што никогаш не може да ви биде здодевно. Веќе е познато дека содржи неколку кул места за секакви активности. Од слатки места за бранч, пабови, луксузни ресторани до уникатни културни локации. Има едно такво место во Лондон – „Електрик синема“. Се работи за едно од најубаво украсените кина. „Електрик синема“ има богата историја, а денес има две локации – Портобело и Вајт Сити.
Историја на киното
„Електрик синема Портобело“ се наоѓа во областа Нотинг Хил во Лондон, на патот Портобело. Тоа е едно од најстарите кина во историјата на Велика Британија, а лесно би можело да се нарече првото кино во таа земја, кое било наменето исклучиво за филмови. Отворено е во далечната 1910 година. Иако било затворено неколку пати во текот на својата историја, киното функционира на оваа адреса речиси непрекинато до денес. Киното е дизајнирано од архитектот Џералд Сејмур Валентин во барокен стил. За време на Втората светска војна киното процветало кога неделно го посетувале 4.000 луѓе, а се верува дека своевремено таму работел озлогласениот британски масовен убиец Џон Кристи како задолжен за проекциите. Со доаѓањето на 60-тите години и промената на филмската индустрија и социјалната клима, киното се фокусирало повеќе на авангардни содржини и независни филмови. Потоа неколку пати се отворало и затворало без комерцијален успех.
Во денешно време
На почетокот на 21 век просторот го купил сегашниот сопственик Питер Сајмон, кој вложил пет милиони фунти во реновирање на внатрешноста и надворешноста на киното, пред да му го даде под закуп на клубот „Сохо хаус“. Тоа е приватен клуб на членови кој се фокусира на креативците и уметноста. Денес сè уште е дел од „Сохо хаус“ и е познато по своето луксузно искуство при гледање филмови.
„Електрик синема“ изгледа навистина џентлменски со своите кожени фотелји и маси со светилки на нив. Се чувствувате како да сте во џез-клуб. Киното го задржало својот винтиџ-шарм, но исто така е модернизирано за да обезбеди максимална удобност за посетителите. „Електрик синема“ нуди: кожени фотелји со потпирачи за нозе, кревети во првиот ред за врвна релаксација, понуда на бар и ресторан со можност за послужување за време на филмот и ќебиња од кашмир за дополнителна удобност.
Репертоарот вклучува комбинација од најновите филмски хитови, култни класици и независни филмови. Иако членовите на „Сохо хаус“ имаат посебни поволности, проекциите се отворени и за јавноста, па секој може да ужива во уникатниот амбиент на ова кино. Тука е и киното „Вајт Сити синема“, исто така дел од „Електрик синема“.
„Вајт Сити синема“
За разлика од историјата на киното Портобело, „Вајт Сити“ било отворено во 2019 година. Се наоѓа во поранешната зграда на Би-би-си. И „Вајт Сити синема“ нуди удобни фотелји, ќебиња од кашмир и маси за да уживате во закуски и пијалаци. Киното е опремено со најнова технологија, а програмата за прикажување вклучува различни филмови, од нови изданија до филмови за деца и специјални неделни матинеа.
Извор: journal.hr
Фото: Instagram