Владите низ Европа воведуваат субвенции, ги намалуваат даноците и ја менуваат енергетската политика за да ги заштитат граѓаните и стопанството од наглиот раст на цените на бензинот и дизелот, поттикнат од нарушувањата во глобалното снабдување со енергенти поради војните на Блискиот Исток и во Украина.
Според извештајот на Организацијата за економска соработка и развој (ОЕЦД), седум од десет држави кои моментално најактивно интервенираат за да ги ограничат економските последици од намалената понуда на енергенти и високите цени на горивата се членки на Европската Унија.
Мерките значително се разликуваат меѓу државите.
Литванија ги преполови цените на железничките билети,
Грција ги зголемува даноците за коцкање за да ја финансира помошта за граѓаните, додека
Италија го одложи планираното затворање на електраните на јаглен и ги поедностави процедурите за нафтените и гасните проекти.
Холандија ги зголеми средствата за програмите за бесплатно подобрување на енергетската ефикасност на домаќинствата, а
Полска разгледува високо оданочување на рекордните профити на одделни производители и трговци со гориво.
Европската Унија е особено изложена на нарушувањата на енергетскиот пазар бидејќи ја увозува речиси целата нафта што ја троши и околу 85 проценти од природниот гас. Увозот покрива околу 57 проценти од енергетските потреби на Унијата. Според организацијата „Транспорт и животна средина“ (Transport & Environment), граѓаните на ЕУ моментално само за дизел дневно издвојуваат околу 203 милиони евра повеќе отколку пред последниот скок на цените.
На членките на ЕУ привремено им е овозможена поголема флексибилност во доделувањето државна помош за домаќинствата и за енергетски интензивните сектори, вклучително и земјоделството, сообраќајот и рибарството.
Франција оваа недела објави пакет помош вреден 450 милиони евра. Околу 5,5 милиони работници кои минуваат поголеми растојанија до работата ќе можат да добијат по 100 евра за трошоци за гориво, додека субвенциите се продолжени и за земјоделците, рибарите и градежните компании.
Германија одлучи од 1 октомври повторно да ги намали даноците за гориво, со што цените на бензинот и дизелот би требало да паднат за 17 евроценти по литар.
Шпанија ги продолжи претходно воведените даночни олеснувања за бензинот и дизелот во рамките на пакетот вреден пет милијарди евра.
Истовремено, членките на ЕУ, во рамките на договорот на 32 земји од Меѓународната агенција за енергија, почнаа да ги користат стратешките резерви за на светскиот пазар да се пласираат вкупно 400 милиони барели нафта.
Фото: magnific