Американскиот технолошки гигант „Гугл“ се најде на удар на критиките во Финска откако за изградба на нови дата-центри беа исечени стотици илјади дрвја.
Финските власти ги запреа работите поради неправилности поврзани со процените за влијанието врз животната средина, а случајот предизвика дебата за еколошката цена на развојот на дигиталната инфраструктура.
На подрачјето на финскиот град Мухос, на северот на Финска, биле исечени приближно 250.000 дрвја на површина од околу 330 хектари. На друга локација, во Отанмики, се проценува дека биле отстранети уште околу 150.000 дрвја, што значи дека вкупниот број би можел да достигне 400.000. Бидејќи дрвјата се исечени илегално, тие не можат да се продадат на преработувачките капацитети.
Без процена на влијанието врз животната средина
Станува збор за процени од организациите за заштита на природата, а не за официјално потврден број на исечени дрвја.
На почетокот од овој месец финската Надзорна агенција му нареди на „Гугл“ привремено да ги прекине работите во Мухос и во селото Отанмики. Причината е тоа што компанијата почнала со работите пред да ги заврши задолжителните процени за влијанието врз животната средина. Случајот предизвика големо незадоволство и отвори национална дебата за улогата на Финска во глобалната трка за изградба на податочни центри, поттикната од брзиот развој на вештачката интелигенција.
Минатата недела раководителот на „Гугл“ за Финска, Анти Јарвинен, се извини за сечењето на шумите, но тврдеше дека компанијата постапувала „според најдоброто разбирање што го имала за финските закони во тоа време“.
Изградбата на дата-центрите во Мухос и Отанмики е дел од инвестицијата на „Гугл“ во инфраструктура за вештачка интелигенција, вредна 13 милијарди евра. Станува збор за најголемиот проект од ваков вид во Финска. Владата, која се соочува со големи буџетски кратења, ги поттикнува ваквите инвестиции.
Сепак, случајот предизвика загриженост кај граѓаните за последиците од ваквите проекти врз локалните заедници, цените на електричната енергија за домаќинствата и природата во Финска, која е извор на национална гордост.
Уништена природа и гнев кај локалното население
Повеќе од 93.000 луѓе потпишале петиција со која се бара построга регулатива за дата-центрите и надомест за локалните заедници за претрпената еколошка штета.
Хана Халменпеа, претседателка на управниот одбор на Финското здружение за заштита на природата, изјави дека била шокирана кога дознала за постапките на компанијата.
- На почетокот не можев да верувам. Никогаш не сум слушнала некоја компанија да направи вакво нешто во Финска. Купија огромно земјиште и едноставно почнаа да сечат. Тоа е чиста ароганција - вели таа.
И локалните жители се гневни поради уништувањето на шумите. Ани Ранта, чие семејство со генерации живее во Отанмики, вели дека волците почнале да доаѓаат во селото откако ја напуштиле уништената шума.
Што велат од „Гугл“?
Од „Гугл“ соопштија дека преземаат мерки за заштита на квалитетот на водата на локацијата во Мухос и дека планираат да засадат дрвја на површина од 130 хектари. Еколозите, сепак, сметаат дека оваа површина е премала за да се надомести нанесената штета.
- Работиме во Финска веќе 15 години и секогаш сме се труделе да ги исполнуваме, па дури и да ги надминуваме барањата во однос на урбанистичкото планирање, животната средина, здравјето и безбедноста. Откако на 6 октомври ги добивме дописите од надлежните органи, ги прекинавме сите активности и целосно ќе ги почитуваме барањата во овој случај. Очекуваме да продолжиме со отворен дијалог со сите надлежни институции - изјави портпаролот на компанијата.
Извор:
The Guardian
Фото:
Screenshot/Guardian-video