Укинувањето на сезонските промени во сметањето на времето може да не се случи во 2019 поради отсуство на консензус кај земјите-членки на ЕУ.
Ова го потврди австрискиот министер за транспорт Норберт Хофер, чија земја претседава со ЕУ до јануари.
- Ако бараме да се направи тоа во 2019, како што сугерира Комисијата, тоа нема да биде поддржано од мнозинството земји-членки - изјави Хофер.
Европската комисија по широка консултација со европската јавност најави дека ЕУ ќе ги укине летното и зимското сметање на времето. Нејзината амбиција е тоа да се случи во 2019 година.
Останува земјите-членки да одлучат дали ќе го одберат летното или зимското сметање на времето, а изборот треба да ѝ го соопштат на Европската комисија до април 2019.
- Во одредни области ќе бидат потребни технички подготовки, на пример, авиокомпаниите велат дека им се потребни најмалку осумнаесет месеци за да се подготват - изјави австрискиот министер.
Тој предупреди дека треба да се внимава да не се создаде „пачворк“ од временски зони.
Извор: МИА