Изградбата на електричен пат ќе го направи Тел Авив првиот град во светот што ќе воспостави широко распространета технологија што ќе може да ги напојува возилата додека возат.

Градот, во партнерството со „Електроен“ и „Ден бас компани“, лансира пилот-проект за инсталирање безжични електрични патишта за полнење на јавниот превоз во градот.

Проектот ќе биде спроведен меѓу железничката станица на Универзитетот во Тел Авив до терминалот Клацкин во Рамат Авив - маршрута од два километри, вклучувајќи 600-метарски електричен пат.

Според соопштението, проектот ќе им овозможи на специјално опремените електрични автобуси, способни да се полнат директно од електричната инфраструктура под патот, да патуваат на самата маршрута.


По завршувањето на тестовите и интеграцијата на технологијата, „Ден бас компани“ ќе почне редовно патување на релација, опслужувајќи патници што патуваат до Универзитетот во Тел Авив.

Градот ќе ја процени можноста за дополнителен електричен транспорт вклучувајќи дистрибутивни камиони и приватни автономни возила.

Пилот-проектот претставува дел од пошироката општинска политика што им придава големо значење на електричните возила и намалување на загадувањето на воздухот во градот. Исто така, електричните патишта ќе помогнат за намалување на загадувањето на бучавата со цел да се подобри квалитетот на животот на жителите и посетителите на градот.

- Не се сомневаме дека ако експериментот биде успешен, не само што ќе се заштедат ресурсите туку и ќе се подобри оперативната ефикасност на јавниот превоз, а можеби дури и ќе произлезе нов метод на електрификација од светски ранг - изјави Меитал Лехави, заменик-градоначалник.