Над 7.000 слободни работни места има во третото тримесечје од годинава во земјава. Најмногу работници се бараат во преработувачката, во трговијата на големо и мало и објектите за сместување и сервисни дејности со храна.

Според објавените податоци на Државниот завод за статистика, во третото тримесечје имало слободни 7.791 работно место, а стапката на слободни работни места изнесувала 1,51 отсто.

Податоците покажуваат дека во преработувачката индустрија имало 2.003 слободни работни места, во трговијата на големо и мало, поправка на моторни возила и мотоцикли 1.420, 813 во објекти за сместување и сервисни дејности со храна, 742 во административни и помошни услужни дејности, 511 во транспорт и складирање, 402 во дејности на здравствена и социјална заштита, 355 во градежништво, 320 во информации и комуникации, 267 во дејноста уметност, забава и рекреација, 237 во образование, 122 во финансиски дејности и дејности на осигурување, 117 во други услужни дејности, 116 во јавна управа и одбрана, задолжително социјално осигурување, 78 во дејности во врска со недвижен имот, 59 во снабдување со вода, отстранување отпадни води, управување со отпад и дејности за санација на околината, 27 во рударство и вадење камен и 15 слободни работни места имало во дејноста снабдување со електрична енергија, гас, пареа и климатизација.

Според бројот на вработени, најмногу работници се барале во претпријатијата што имаат над 250 вработени, 2.286, потоа 2.141 во претпријатија со број на вработени до 50 до 249, 2.019 слободни работни места имало во претпријатија со вработени од 10 до 49 и 1.345 работни места во претпријатија со три до девет вработени.

Од регионите со најмногу слободни работни места бил Скопскиот со 3.678, 1.061 во Пелагонискиот, 844 во Југозападниот, 418 во Источниот, 415 во Вардарскиот Регион, 268 во Североисточниот и 183 во Полошкиот Регион.