По неколкуте забележувања на риба која живее во длабоките води, јапонските социјални мрежи се преплавени со стравувања дека тоа е предвесник на земјотреси и цунами.
Во петокот две риби наречени „
oarfish“ биле откриени откако биле фатени во мрежи за риболов кај северната префектура Тојама, со што бројот на пронајдените вакви риби за оваа сезона се искачи на седум. Неделава ваква риба долга 3,2 метри се појави на брегот на заливот Тојама, додека една долга четири метри беше фатена во мрежа во близина на простаништето Имизу.
Овие неуловливи риби живеат на длабочина меѓу 200 и 1.000 метри. Тие се сребреникави со црвени перки. Во Јапонија тие се познати како „Ryugu no tsukai" или „Гласникот од палатата на морскиот бог“, а легендата вели дека тие испливуваат на бреговите пред да се случат подводни земјотреси. Но, научниците ги негираат тие тврдења.
-Нема никаков научен доказ за теоријата дека овие риби се појавуваат пред големи земјотреси. Но, не можеме со 100-отстотна сигурност да ја негираме можноста. Можно е глобалното затоплување да има влијание на појавувањето на рибите, или пак некоја друга причина за која не сме свесни - истакнува Казуса Саиба, чувар во аквариумот „Уозу“.
Митот дека овие риби се предвесник на катастрофа се популаризира по земјотресот и последователното цунами во Фукушима во 2011 година, кога загинаа повеќе од 20.000 луѓе. Во текот на годината пред катастрофата, на бреговите на Јапонија се појавија најмалку десетина вакви риби.
Иако се сомнева во валидноста на теоријата, Саиба истакнува дека едно можно научно објаснување може да биде дека суптилните промени во кората на Земјата на дното од морето пред земјотрес може да предизвикуваат струјата да ги турка суштествата од дното на површината.
Но, Осаму Инамура, директор на аквариумот, има друга научна теорија за појавувањето на рибите. Тој вели дека тие го следат движењето на нивната храна - еден вид на микро морски ракчиња.
-Кога ракчињата ќе се издигнат кон планктоните во текот на денот, рибите некогаш може да ги следат и да бидат фатени во мрежите на риболовците -
објаснува Инамура.