Истражувачи од Универзитетот „Оксфорд“ направиле анализа за да го одговорат ова прашање и откриле дека дури една третина од лицата со ковид-19 имале симптоми 3-6 месеци по дијагнозата. Во многу случаи пациентите мислеле дека оздравеле, а по неколку недели забележале нови симптоми или сфатиле дека не се целосно оздравени.

Истражувачите откриле и дека симптомите се разликувале во зависност од возраста и полот, но и нивната сериозност на почетокот. Во анализата биле употребени податоци од речиси 274.000 Американци што имале ковид-19, кои биле споредени со околу 114.000 лица што имале грип во истиот период.

Биле идентификувани 9 потенцијални симптоми на долг ковид-19. Дури 37 отсто од пациентите со ковид-19 имале барем еден од овие 9 симптоми, а тоа е 1,5 пати повисок процент од пациентите со грип.


Меѓу симптомите се наведуваат абнормално дишење, проблеми со абдоменот, болка во грлото или во градите, когнитивни проблеми, умор, главоболка, болка во мускулите, друг вид болка и анксиозност или депресија.

Најчест симптом бил анксиозност или депресија бидејќи 15 отсто од испитаниците го имале 3-6 месеци по дијагнозата. Меѓутоа, доколку се анализираат сите видови болка заедно, тогаш болката станува најчест долгорочен симптом на ковид-19. Истражувачите откриле и дека болката како симптом почесто се јавувала подоцна.

Жените и помладите лица почесто имале главоболки и болка во мускулите, а жените почесто имале и проблеми со абдоменот и анксиозност или депресија. Мажите почесто имале проблеми со дишењето и когнитивни проблеми.

Извор: World Economic Forum