Евтината дневна тарифа на електричната енергија започнува со примена од 1 декември во периодот од 13 до 15 часот, и во првите 10 дена од декември најголем дел од потрошувачите, односно најголем дел од домаќинствата ќе имаат пристап до евтината тарифа, потврди денеска претседателот на Регулаторната комисија за енергетика (РКЕ), Марко Бислимоски.
-Тарифниот систем за евтината дневна тарифа е донесен уште во јуни, објавен е во „Службен весник“, нема никакви измени и сето тоа ќе стартува и ќе си функционира беспрекорно. Значи, нема никакви проблеми. Евтината тарифа ќе биде воведена и тоа ќе биде одлична вест за граѓаните, особено за пензионерите кои во изминатиот период кажаа јасно и гласно дека таа многу им помага во нивниот стандард и од тоа нема отстапки - рече Бислимоски.
Тој нагласи дека потрошувачите треба да ѝ веруваат на РКЕ.
- Ние не бегаме, со секој што сака да разговара на оваа тема ќе разговараме, ќе се убедуваме, ќе се докажуваме, но многу пати досега докажавме дека тоа што сме го кажале тоа и се реализирало. Како ќе биде во наредниот период, не зависи само од РКЕ, зависи од многу други чинители. Што може да преземе РКЕ како во случајот со парното ќе преземе, за да не дозволиме ценовни шокови за потрошувачите во државата - потенцира Бислимоски.
Извор: МИА