Можеби ви изгледа како безопасно скролање додека сте во тоалетот, но вистината е многу „повалкана“, и тоа буквално. Навиката да носиме телефон во тоалет стана толку вообичаена, што веќе и не размислуваме за неа. Сепак, гастроентеролози и микробиолози предупредуваат дека оваа навика може да биде штетна, нехигиенска, па дури и опасна.
Телефонот како колонија на бактерии
Експертите истакнуваат дека секојдневното скролање во тоалет може да го претвори телефонот во вистинско легло на бактерии, вклучувајќи ја и опасната ешерихија коли. Кога влегувате во тоалет со телефон, го изложувате на облак од невидливи микроорганизми. Дури и ако ги измиете рацете, бактериите може повторно да ви се вратат за секунда штом ќе го земете заразениот телефон.
Микробура од веце-школката
Пуштивте вода? Во тој момент се создава облак од микроскопски капки кој се шири до 1,5 метар во височина и ширина. Тие честички носат сè што не сакате да се најде на вашиот телефон, лице, облека или четка за заби. Површини како што се подот, ѕидовите и машината за перење стануваат контаминирани, а телефонот, ако е во близина, станува идеална цел.
Освен хигиенските ризици, скролањето во тоалет го продолжува времето поминато на веце-школката, што според гастроентерологот д-р Саураб Сети може да доведе до сериозни здравствени проблеми: хемороиди, анални пукнатини, ректален пролапс и слично. Колку подолго седите, толку е поголем притисокот врз ректумот и толку е поголем ризикот.
Најлошото место за телефон - подот
Ако некогаш ви падне на ум да го оставите телефонот на подот додека сте во тоалет, размислете повторно. Подот околу веце-школката е едно од највалканите места во домот. Фекалните бактерии таму можат да преживеат со денови, дури и кога сè изгледа чисто.
Како да се заштитите?
Ако веќе морате да го понесете телефонот со себе, не користете го додека сте во тоалет. Држете го в џеб и дезинфицирајте го барем двапати неделно, најдобро со алкохолни марамчиња. Според микробиолозите, мобилниот телефон по количина на бактерии е еднаков со кваката, прекинувачот или веце-школката, но го чистиме многу поретко.
Извор:
6yka.com
Фото: Freepik