Доколку го планирате вашето следно патување со вашите пријателки, имаме возбудливи вести за вас - Порто штотуку е прогласен за најдобар град за патување со вашите пријателки. Оваа шармантна португалска дестинација на атлантскиот брег, го освои првото место благодарение на совршената рамнотежа помеѓу опуштена атмосфера и разновидни активностикои ги нуди. Во студијата, спроведена од „Тајтан Травел“, на секој град му била доделена оценка од 1 до 10, со фактори кои се движат од бројот на бесплатни атракции, до индексот на безбедност на градот.

Други фактори вклучуваат број на спа центри и велнес центри во градот, пабови, ресторани и клубови, како и цената на хотелските соби со три ѕвездички. Порто постигна оценка од 8,68 од 10. На високо второ и трето место, е италијанскиот град Фиренца и шкотскиот град Единбург, соодветно.

Порто: Што да посетите?

Без разлика дали сте расположени за културно истражување, вински тури, ден на плажа или ноќно излегување, Порто има сè за еден викенд. Градот е компактен, па можете да го истражите пеш без потреба од комплициран превоз. Порто е исто така рај за гурмани. Пробајте го франчесиња, локален сендвич со стопено сирење и сос од пиво, а има и бројни ресторани покрај реката со фантастични менија со риба и вина. Ако сте расположени за ноќен излез, погледнете ги баровите на улицата Галеријас де Париз со нивната одлична атмосфера. Подолу, ви носиме идеи за тоа што да видите во Порто.

Рибеира

Сместен веднаш на брегот на реката Дуро, Рибеира е најстариот и еден од најживописните делови на Порто. Неговите шарени куќи со алишта што висат од нивните прозорци, улички со калдрма и мали таверни што продаваат локално вино, ја создаваат таа типична атмосфера на „разгледница“ што веројатно ќе ве освои на прв поглед. Рибеира е совршена база за истражување на градот, но исто така е одлично место само да седнете, да ги набљудувате луѓето и да ја впиете опуштената португалска атмосфера со поглед на прекрасниот мост Дом Луис I.