Новиот брод „Херој на морињата“ (Hero of the Seas), во сопственост на компанијата „Ројал Карибијан интернешнл“, привлекува внимание како најголем крстосувач на светот иако сè уште не запловил. Неговото прво патување е планирано за август 2027 година од Мајами, а интересот на патниците го потврдува и фактот дека резервациите се веќе отворени.
Димензиите на бродот ги поместуваат границите на досегашните стандарди
Со тежина од 250.800 тони, должина од 365 метри и ширина од 65 метри, „Херој на морињата“ претставува вистински инженерски потфат. На неговите 20 палуби можат да престојуваат до 7.600 патници со дури 2.350 членови на екипажот, што го прави вистински град на вода.
Посебен акцент е ставен на содржините за забава и рекреација
Бродот ќе има дури девет базени, повеќе од кој било крстосувач досега, вклучувајќи зони наменети исклучиво за возрасни и најголемиот бар во вода на светот. Покрај тоа, планиран е и најголемиот воден парк на море, со симулатори за сурфање, карпа за качување и разни спортски терени.
Бродот ќе има 2.814 кабини, при што стандардниот капацитет при двојна пополнетост изнесува 5.654 патници. Ќе има 28 различни ресторани и барови. Посебно внимание привлекува и иновативниот ресторан осмислен како искуство на патување со воз, што покажува колкав акцент се става на доживувањето, а не само на самата понуда на храна.
Фото: скриншот/јутјуб