Германското здружение за технички преглед и безбедност во сообраќајот се залага за воведување нулта толеранција на алкохол за сите возачи на моторни возила, а истражувањето покажува дека ваквиот предлог го поддржуваат мнозинството германски граѓани.

Според резултатите од истражувањето „ТУВ мобилити студи 2026“, дури 71 отсто од Германците поддржуваат целосна забрана за алкохол за возачите на автомобили. Кога станува збор за мотоцикли, скутери, мопеди и моторни велосипеди, поддршката изнесува 74 отсто, додека за електрични тротинети се залагаат 67 отсто од испитаниците.

Построги правила поддржува и мнозинството кога станува збор за велосипедистите. За нулта толеранција на алкохол се 54 отсто од испитаните. Речиси половина од учесниците во истражувањето, односно 49 отсто, сметаат дека забраната за алкохол треба да важи за сите наведени видови превозни средства. Од друга страна, 18 отсто од испитаниците целосно го одбиваат ваквиот предлог.

Истражувањето го спроведе агенцијата „Форса“, а во него учествувале 2.504 лица постари од 18 години.

Жените и постарите почесто поддржуваат нулта толеранција

Резултатите покажуваат и разлики во ставовите на мажите и жените. Целосна забрана за алкохол за возачите на автомобили поддржуваат 78 отсто од жените, во споредба со 63 отсто од мажите.

Кога станува збор за сите видови возила, за нулта толеранција се 57 отсто од жените и 40 отсто од мажите. Исто така, мажите двојно почесто од жените го одбиваат ваквиот предлог - 24 отсто од нив се противат на целосната забрана, во споредба со 12 отсто од жените.

Разликите се уште поизразени меѓу возрасните групи. Целосна забрана за алкохол за сите видови возила поддржуваат 31 отсто од испитаниците на возраст од 18 до 29 години, 47 отсто од оние меѓу 30 и 44 години и 48 отсто од граѓаните на возраст од 45 до 59 години. Меѓу постарите од 60 години поддршката расте на 59 отсто.

Речиси сите учесници во истражувањето се свесни за опасноста од возењето под дејство на алкохол. 86 отсто сметаат дека возењето под дејство на алкохол е многу опасно, а дополнителни 12 отсто сметаат дека е прилично опасно.

Спуштање на границата кај велосипедистите на 1,1 промил

Во Германија возачите на моторни возила моментално смеат да имаат до 0,5 промили алкохол во крвта. Нулта толеранција важи за возачите почетници во текот на пробниот период и за помладите од 21 година. Доколку возачот покажува знаци на неспособност за управување со возилото поради алкохол, кривично дело може да стори веќе при 0,3 промили.

Границата за апсолутна неспособност за возење автомобил изнесува 1,1 промил, додека за велосипедистите таа моментално е поставена на 1,6 промили.

Германското здружение за технички преглед и безбедност во сообраќајот смета дека и таа граница за велосипедистите е превисока и предлагаат нејзино спуштање на 1,1 промил, како и воведување посебна парична казна за велосипедистите што возат под дејство на алкохол.

Истражувањето е спроведено од 19 март до 10 април 2026 година, на репрезентативен примерок од 2.504 лица постари од 18 години.

Извор: n1info.hr
Фото: Magnific