Шеснаесетгодишниот Ејден Ендрјус од американската сојузна држава Вајоминг, за време на нуркачки излет покрај брегот на Манасота Ки, пронашол заб од праисториски морски предатор – мегалодон – долг околу 15 сантиметри.
Ејден бил со татко му Брајан, а заедно учествувале во нуркање организирано од локалната компанија „Фосил џанкис“, специјализирана за потрага по фосили.
Капетанот Џон Критсулас изјави дека пронаоѓањето помали заби од мегалодон не е вообичаено, но примероци со оваа големина се вистинска реткост.
Целиот момент на откривањето е забележан и со камера, а снимката прикажува како Ејден и неговиот татко слават откако сфатиле каков наод откриле.
Мегалодон - најголемиот морски предатор во историјата
Мегалодонот ѝ е познат на пошироката јавност благодарение на многубројните холивудски филмови за морски чудовишта. Според податоците на Институтот Смитсонијан, станува збор за најголемата ајкула што некогаш живеела.
Научниците проценуваат дека најголемите примероци можеле да достигнат должина до 18 метри, со тежина од дури 50 тони. Токму поради таквите димензии, нивните заби биле импресивни – колку човечка рака, што го потврдува и откритието на младиот нуркач.
Владетел на океаните кој исчезнал пред милиони години
Според истиот извор, мегалодонот живеел пред 23 до 3,6 милиони години и ги населувал океаните низ целиот свет. Неговите фосилизирани заби денес се меѓу најбараните меѓу колекционерите и истражувачите.
Фото: