Барселона почна со реализација на амбициозниот 10-годишен план за отстранување на автомобилите од улиците и намалување на загадувањето преку создавање зелени површини и јавни плоштади.

Една од три улици во загадената централна област Еиксампле ќе стане зелена зона, која ќе им дава предност на пешаците и велосипедистите, а раскрсниците ќе добијат јавни плоштади, така што ниту еден граѓанин нема да биде оддалечен повеќе од 200 метри од плоштад или мал парк.

- Планот на инженерот Илдефонс Серда на крајот од 19 век ја модернизира Барселона, а ние го оживуваме тој дух на урбана трансформација за да ја донесеме Еиксампле во 21 век - вели заменик-градоначалникот Џенет Санц.


Целта на новиот план е да го зголеми јавниот простор во градот и да го реши хроничниот проблем со загадувањето.

Барселона речиси никогаш не ги исполнува ограничувањата на ЕУ или на Светската здравствена организација за нивото на загадувањето - ограничувањата на СЗО за NO2 се 40 микрограми на кубен метар, додека во поголемиот дел од градот нивото е над 46 µg/m 3.


Откако државата беше заклучена во март, градот создаде 29-километарски велосипедски патеки, со што сега има речиси 240 километри велосипедски патеки и 12 километри тротоар. Во истиот период градот елиминира 1.300 места за паркирање.

За дизајнот на плоштадите и зелените површини ќе се одлучува со помош на отворен натпревар. Крајниот датум за пријавување е 17 декември.