Сите понекогаш имаме проблеми со спиењето, а тоа им се случува дури и на лекарите што се експерти во областа на спиењето. Во истражување од 2006 година 68% од испитаниците изјавиле дека имаат проблем да заспијат барем еднаш неделно.

- Нормално за сите нас е да имаме несоница или да не спиеме добро, но проблемот станува посериозен за луѓето што се анксиозни и се фокусираат на нивното спиење. Запомнете, нормално е да спиете лошо одвреме-навреме. Колку повеќе се нервирате за спиењето, толку се помали шансите да се вратите во нормала - изјавил Рушир П. Пател, медицински директор на Институтот за несоница и спиење во Аризона.


Не гледаат на часовникот

- Кога ќе се разбудам среде ноќ, се обидувам да не гледам во часовникот бидејќи така лесно може да станам анксиозен за губењето на сонот и да ја влошам несоницата - вели Раж Дасгупта, помошник-професор по клиничка медицина на Универзитетот во Јужна Калифорнија.

Слушаат смирувачка музика

- Ја слушам „Спиење“ на Макс Рихтер во бидејќи тоа е уникатна класична музика на која тој работел со невронаучници за да создаде мелодија со тонови кои помагаат во релаксирањето на мозокот и во спиењето. Со сопругата ја користиме и за нашето 15-месечно бебе и му помага - вели Пател.


Се обидуваат да уживаат

- Научив да уживам кога сум буден во креветот. Ми претставува задоволство да имам тивко, удобно време за размислување, планирање и едноставно да бидам присутен во моментот. Кога се однесуваш кон ситуацијата како кон „жив“ кошмар, како што го нарече еден пациент, веќе си ја изгубил битката - вели В. Крис Винтер, претседател на Центар за неврологија и спиење во Шарлотвил.

Се потсетуваат дека може да спијат во текот на викендот

- Тоа ми помага да не се грижам затоа што не сум спиел добро минатата ноќ или дека сум уморен дента - вели Пател.

Не гледаат во телефонот

- Се обидувам да не го земам телефонот бидејќи доколку го вклучам, наеднаш почнувам да одговарам на е-пораки, да проверувам „Инстаграм“ или да гледам серија - вели Дасгупта.

Одат во друга соба и читаат нешто здодевно


Се обидуваат да не земаат апчиња за спиење

- Обично не земам апчиња за спиење бидејќи е лесно да се навикнете на нешто што ви помага да заспиете - вели Пател.

Доколку навистина им треба нешто, земаат малку мелатонин

- Ретко земам мелатонин, 3 до 5 милиграми, по потреба - вели Анупама Рамалингам, лекар специјалист по спиење на Универзитетот за несоница и спиење во Аризона.


Излегуваат надвор наутро

- Може да бидете изложени на светлина ако пешачите или појадувате надвор - вели Стејси Ган, лекар специјалист по спиење на Универзитетот за несоница и спиење во Аризона.

Се фокусираат на одмор наместо на спиење

- Знам дека медитацијата е процес на обновување, слично како и спиењето. За разлика од спиењето, одморот е нешто над кое имам целосна контрола. Одбирам да се фокусирам на она што можам да го контролирам - вели Винтер.

Издвојуваат време за вежбање

- За да имам подобар сон, вежбам барем 20 минути дневно, без разлика дали тоа ќе биде во вежбалница или групно пешачење со семејството надвор или во паркот - вели Дасгупта.

Си кажуваат дека не е голем проблем доколку не се наспијат една вечер

- Секогаш си велам себеси дека е во ред доколку не се наспијам доволно вечерва и дека не е крајот на светот. Ова ми помага да не се нервирам, што впрочем може да ви предизвика проблеми со сонот. Исто така, ги запишувам моите мисли - вели Рамалингам.

Одбегнуваат шеќер и кофеин доцна навечер

- Се обидувам да јадам добро пред да легнам во кревет, што не е лесно. Обожавам брза храна, но обично се обидувам да одбегнувам јаглехидрати и храна со многу шеќер и кофеин - вели Дасгупта.

Имаат свои ритуали за заспивање

- Ритуалот почнува два часа пред легнување и се состои од одбегнување на технологијата, читање книги на моите деца, изладување на собите и исклучување на светлата. Кога децата се среќни и мирни, подобро спијам - вели Дасгупта.

Автор: Келси Борсен
Извор: huffingtonpost.co.uk